Sahibkarlıq

Ana səhifə

Sahibkarlıq

İstehlak bazarında saxlama müddəti ötmüş mallar satılır

20 iyul 2009 15:59 (UTC +04:00)

Bakı. Aynur Vəliyeva – APA-Economics. İqtisadi İnkişaf Nazirliyi yanında İstehlak Bazarına Nəzarət üzrə Dövlət Xidməti istehlakçıların hüquqlarının müdafiəsi, istehlak bazarının keyfiyyətsiz və insan sağlamlığı üçün təhlükə törədə biləcək mallardan qorunması istiqamətində 2009-cu il ərzində istehlak bazarında həyata keçirdiyi nəzarət tədbirləri ilə bağlı təhlil aparıb.
İİN-dən “APA-Economics”ə verilən məlumata görə, ilkin təhlillər göstərir ki, ticarət obyektlərində əsasən normativ-texniki sənədlərin tələblərinə cavab verməyən və ya saxlama müddəti ötmüş malların satılması, məhsulların üzərində etiketlərin və müvafiq məlumatların Azərbaycan dilində olmaması, temperatur rejiminə əməl edilməməsi və digər qanun pozuntularına yol verilir.
İİN-in məlumatına əsasən, bu il mayın 17-dən etibarən “Azərbaycan Respublikasının İnzibati Xətalar Məcəlləsinə dəyişikliklər və əlavələr edilməsi haqqında” qanun qüvvəyə mindikdən sonra qeyd olunan pozuntularla bağlı cərimələrin məbləği bir neçə dəfə artırılıb. Belə ki, saxlama müddəti ötmüş malların satılmasına görə əvvəllər fiziki şəxslərə 30-50 manat, hüquqi şəxslərə isə 150-200 manat cərimə tətbiq edilirdisə, indi bu pozuntulara görə cərimələrin məbləği fiziki şəxslər üçün 1500-2000 manat, hüquqi şəxslər üçün 4000-5000 manatdır.
Dövlət Xidməti cərimələrlə üzləşməmək üçün bütün topdan və pərakəndə satış obyektlərinin sahiblərinə satış məqsədləri üçün mal alarkən daha diqqətli olmağı, istehlakçı hüquqlarına hörmətlə yanaşmağı tövsiyə edir. Sahibkarlar aldıqları malların standartların və digər normativ-texniki sənədlərin tələblərinə uyğun etiketlənməsinə, mala dair məlumatların digər xarici dillərlə yanaşı, Azərbaycan dilində də yazılmasına, məhsulun üzərində istehsal və saxlama müddətinin göstərilməsinə, həmçinin malın normativ sənəddə göstərilən şəraitdə və temperatur rejimində saxlanmasına ciddi riayət etməlidirlər.
Xatırladaq ki, istehlakçıların malların (işlərin, xidmətlərin) lazımi keyfiyyətdə olmasına, təhlükəsizliyinə, onların keyfiyyəti haqqında dolğun, düzgün məlumat əldə etməyə və s. hüquqları var və bu hüquqlar dövlət tərəfindən qorunur.