Sahibkarlıq

Ana səhifə

Sahibkarlıq

Bu il Azərbaycanda 280-dək kiçik dövlət müəssisəsi və obyekti özəlləşdirilib

05 avqust 2009 14:11 (UTC +04:00)

Bakı. Nicat Mustafayev – APA-Economics. Bu ilin yanvar-iyul ayları ərzində Azərbaycanda 280-ə yaxın kiçik dövlət müəssisəsi və obyekti özəlləşdirilib.

Əmlak Məsələləri üzrə Dövlət Komitəsindən «APA-Economics»ə verilən məlumata görə, hesabat dövründə Dövlət əmlakının özəlləşdirilməsinin II Dövlət Proqramı çərçivəsində dövlət əmlakının özəlləşdirilməsinin sürətləndirilməsi sahəsində əməli tədbirlər davam etdirilib. Belə ki, 280-ə yaxın kiçik dövlət müəssisəsi və obyektinin özəlləşdirilməsi ilə yanaşı, 2009-cu ildə dövlət mülkiyyətində olan, habelə özəlləşdirilmiş müəssisə və obyektlərin yerləşdiyi 270-ə yaxın torpaq sahəsi də özəlləşdirilib.

Bundan başqa, hesabat dövründə səhmdar cəmiyyətlərinin səhmlərinin özəlləşdirilməsi ilə bağlı 30 hərrac keçirilib. Bu hərraclarda müxtəlif regionlarda yerləşən, iqtisadiyyatın ayrı-ayrı sahələrinə aid 30-a yaxın səhmdar cəmiyyətinin səhmləri özəlləşdirilib.

İnvestisiya müsabiqəsi vasitəsilə özəlləşdirilmiş müəssisələrə 2009-cu ilin yanvar-iyul aylarında müqavilələr üzrə müsabiqə qalibləri tərəfindən 30 mln. manat məbləğində investisiya qoyulub. Ümumilikdə isə, cari ilin avqustun 1-dək keçirilmiş investisiya müsabiqələri üzrə özəlləşdirilmiş 82 müəssisəyə 430 mln. manat investisiya qoyulub və bu müəssisələrdə təqribən 12,5 mindən çox iş yeri açılıb.

Qeyd edək ki, hesabat dövründə həmçinin dövlət əmlakının idarə edilməsinin effektivliyinin artırılması, onun qorunub saxlanılması və təyinatı üzrə istifadə olunması, habelə dövlət mülkiyyətində olan torpaq sahələrinin istifadə vəziyyətinin araşdırılması, bu sahədə səmərəli istifadənin təmin edilməsi və nəzarətin həyata keçirilməsi, dövlət müəssisələrinin özəlləşdirmədən sonrakı fəaliyyətinin monitorinqinin aparılması, müəssisələrdən hesabatların və inventarlaşdırma aktlarının alınması və təhlili istiqamətində də işlər həyata keçirilib. Aparılan işlər nəticəsində ümumilikdə 260-a yaxın müəssisə və obyektin torpaq sahələrindən təyinatı üzrə istifadə edilməməsi və qeyri-qanuni tikinti işlərinin aparılması halları aşkar edilib. Bununla bağlı qanuna müvafiq tədbirlərin görülməsi üçün aidiyyəti dövlət qurumlarına müraciətlər edilib.