Sahibkarlıq

Ana səhifə

Sahibkarlıq

Xaçmazda «İstehlakçı hüquqlarının qorunmasına dövlət qayğısı» mövzusunda regional konfrans keçirilib

07 avqust 2009 11:13 (UTC +04:00)

Xaçmaz. Könül Ramazanova - APA. Bu gün Xaçmazda İqtisadi İnkişaf Nazirliyinin təşəbbüsü ilə «İstehlakçı hüquqlarının qorunmasına dövlət qayğısı» mövzusunda regional konfrans keçirilib.

İqtisadi İnkişaf Nazirliyi yanında İstehlak Bazarına Nəzarət üzrə Dövlət Xidmətinin, eləcə də Siyəzən, Dəvəçi, Xaçmaz, Quba və Qusar rayonlarından olan sahibkarların, ictimai təşkilatların və aidiyyəti dövlət orqanlarının iştirakı ilə keçirilən konfransda son dövrlər istehlakçı hüquqlarının qorunması ilə bağlı görülən işlər, əldə olunan nəticələr geniş müzakirə olunub.

İstehlak bazarının keyfiyyətsiz və təhlükəli mallardan qorunması, həmçinin istehlakçı hüquqlarının müdafiəsi sahəsində görülən tədbirlərdən söz açan İstehlak Bazarına Nəzarət üzrə Dövlət Xidmətinin rəisi Zahid İsayev jurnalistlərə verdiyi açıqlamasında bildirib ki, 2009-cu il yanvar-iyun ayları ərzində saxlama müddəti ötmüş 40 tondan çox müxtəlif növ ərzaq məhsulları aşkarlanıb. «Azərbaycan üzrə 400-ə yaxın yoxlama aparılıb. Həmin yoxlamaların 380-də vaxtı ötmüş ərzaq məhsulları aşkarlanıb. O cümlədən, insanların gündəlik istehlakında geniş istifadə olunan qənnadı və kolbasa məmulatları, pendir, yağ, makaron, toyuq, tomat və s. malların, 130 kq-dan artıq uşaq qidasının, 3 900 ədəd uşaq oyuncağının, 2 300 ədəd uşaq geyimlərinin, 1 000 tona yaxın saxta sementin satışdan çıxarılması ilə bağlı konkret tədbirlər görülüb», - deyə Z.İsayev bildirib.

Konfransda bölgədə istehlakçı hüquqlarının qorunması istiqamətində görüləcək ciddi tədbirlər müəyyənləşdirilib.