Sahibkarlıq

Ana səhifə

Sahibkarlıq

Azərbaycan Latviyaya Naxçıvanın investisiya imkanlarını təqdim edib

10 avqust 2009 09:52 (UTC +04:00)

Bakı. Nicat Mustafayev – APA-Economics. Bu gün Bakıda Latviyanın prezidenti Valdis Zatlersin Azərbaycana rəsmi səfəri çərçivəsində Latviyanın nümayəndə heyətinə Naxçıvan Muxtar Respublikasının investisiya imkanlarının təqdimatı keçirilib. Tədbir Azərbaycan İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondu (Azpromo) və Latviyanın Azərbaycandakı səfirliyi tərəfindən təşkil olunub.

«APA-Economics»in məlumatına görə, tədbirdə çıxış edən Azərbaycanın iqtisadi inkişaf nazirinin müavini Niyazi Səfərov Azərbaycanın ümumi iqtisadi inkişafından məlumat verib və qeyd edib ki, son 5 il ərzində ölkə iqtisadiyyatı 2,5 dəfə, sənaye sektoru isə 2,6 dəfə artıb. Hazırda Azərbaycanda qeyri-neft sektorunun prioritet sahə olduğunu bildirən nazir müavini həmçinin qeyd edib ki, bu sahəyə investisiyaların yatırılmasına geniş imkanlar mövcuddur: «Təkcə bu ilin ilk yarısında Azərbaycanda ümumi daxili məhsul ötən ilin analoji dövrü ilə müqayisədə 3,6%, qeyri-neft sektoru isə 4,1% artıb».

N.Səfərov onu da bildirib ki, Naxçıvan Muxtar Respublikasının hazırda blokada şəraitində olmasına baxmayaraq, həmin region ölkənin ən dinamik inkişaf edən bölgələrindən biridir.

Tədbirdə çıxış edən Naxçıvan Muxtar Respublikasının iqtisadi inkişaf naziri Famil Seyidov Naxçıvanın tarixindən və iqtisadi inkişafından danışıb və bildirib ki, son illər ərzində Naxçıvanda 70 təhsil, 67 səhiyyə və 4 mindən artıq sosial infrastruktur obyekti istifadəyə verilib: «Hazırda Naxçıvanda biznes fəaliyyəti ilə məşğul olmaq üçün əlverişli mühit yaradılıb». Sonda F.Seyidov latviyalı iş adamlarını Naxçıvana investisiya yatırmağa dəvət edib.

Qeyd edək ki, bu gün həmçinin Azərbaycan və Latviya arasında turizm, İKT, maliyyə və təhsil sektoru üzrə dəyirmi masalar təşkil olunacaq. Avqustun 11-də isə Bakıda Azərbaycan-Latviya biznes-forumu keçiriləcək.