Sahibkarlıq

Ana səhifə

Sahibkarlıq

Bakıda Azərbaycan-Almaniya biznes-forumu keçirilib

12 avqust 2009 09:16 (UTC +04:00)

Bakı. Nicat Mustafayev – APA-Economics. Bu gün Almaniya-Azərbaycan İqtisadi Birliyinin (DAWF) təşkilatçılığı ilə Bakıda X Azərbaycan-Almaniya biznes-forumu keçirilib.
«APA-Economics»in məlumatına görə, tədbirdə çıxış edən DAWF-ın İdarə Heyətinin sədri Marko Qraff DAWF-ın fəaliyyəti və məqsədlərindən məlumat verib. O, qeyd edib ki, 1998-ci ildən Azərbaycanda fəaliyyətə başlayan təşkilatın artıq 100-dən artıq üzvü və Azərbaycan İnvestisiya Şirkəti, Azərbaycanda İxracın və İnvestisiyaların Təşviqi Fondu (Azpromo) kimi partnyorları mövcuddur.
Almaniyanın Baden-Vürttemberq torpağının baş naziri Günter Oettinger çıxışında qeyd edib ki, Azərbaycan Almaniya üçün Avropadan Asiyaya birbaşa qapı açan ölkədir: “Azərbaycan uzun illərdir ki, neft-qaz sahəsində xammal istehsal edən ölkə kimi tanınır. Baden-Vürttemberq torpağı sənaye regionu olduğundan, Azərbaycanda istehsal olunan məhsullar bizim üçün maraq doğurur. Biz isə öz növbəmizdə Azərbaycana istehsal etdiyimiz texniki avadanlıqlarla cavab verə bilərik. Ümid edirəm ki, Azərbaycan və Almaniya arasında yaradılan əlaqələr hər iki ölkə üçün xeyir gətirəcək”.
G.Oettinger həmçinin gələn XI Azərbaycan-Almaniya biznes-forumunu Ştutqartda (Almaniya) keçiriləcəyini bildirib.
Tədbirdə çıxış edən Azərbaycanın iqtisadi inkişaf naziri Şahin Mustafayev qeyd edib ki, Azərbaycanın Avropa İttifaqı, o cümlədən Almaniya ilə əlaqələri inkişaf etməkdədir və təkcə Almaniya ilə Azərbaycan arasında 27 sənəd imzalanıb, iki ölkə arasında ticarət dövriyyəsinin həcmi də ilbəil artmaqda davam edir: “Azərbaycan və Almaniya arasında sənaye, İKT, kənd təsərrüfatı, turizm və bir sıra digər sahələrdə əlaqələri genişlənir”.
Azərbaycanın iqtisadi inkişafından danışan nazir həmçinin bildirib ki, ötən dövr ərzində Azərbaycan iqtisadiyyatına 65 mlrd. ABŞ dolları məbləğində vəsait yatırılıb ki, bunun da yarısından çoxu xarici sərmayədir.
Azərbaycanın kənd təsərrüfatı naziri İsmət Abbasov ölkənin aqrar-sənaye sektorun barədə məlumat verib və qeyd edib ki, əgər 2006-cı ildə Azərbaycanın kənd təsərrüfatı sahəsində xarici ticarət dövriyyəsinin həcmi 706 mln. dollar təşkil edirdisə, 2007-ci ildə bu rəqəm 1,2 mlrd. dollara, 2008-ci ildə isə 1,3 mlrd. dollara çatıb: “Ümid edirəm ki, tədbir çərçivəsində iki ölkə arasında keçirilən görüşlərin Azərbaycanın aqrar-sənaye sektorunun inkişafına təkan verəcək”.
Qeyd edək ki, Almaniyanın nümayəndə heyətinin tərkibinə tikinti, kənd təsərrüfatı, maşınqayırma, turizm, konsaltinq, neft-qaz, təhlükəsizlik, inşaat və digər sahələrdə fəaliyyət göstərən 16 şirkətin təmsilçiləri iştirak edib. Forum çərçivəsində Almaniya və Azərbaycan şirkətləri arasında ikitərəfli görüşləri əhatə edən əlaqələr və əməkdaşlıq birjası da keçirilib.