Sahibkarlıq

Ana səhifə

Sahibkarlıq

Gələn ay Azərbaycanda beynəlxalq sərgilərin payız mövsümü başlayır

17 avqust 2009 14:20 (UTC +04:00)

Bakı. Nicat Mustafayev – APA-Economics. Bu ilin sentyabr ayının 10-dan etibarən Azərbaycanda beynəlxalq sərgilərin payız sərgi mövsümü işə başlayacaq.

Sərgilərin əsas təşkilatçısı olan Böyük Britaniyanın «İTE Group» şirkətinin Qafqazdakı eksklyuziv tərəfdaşı - «İteca Caspian» şirkətindən «APA-Economics»ə verilən məlumata görə, payız sərgi mövsümünü sentyabrın 10-12-də Bakıda keçiriləcək III Azərbaycan Beynəlxalq Təhsil və Karyera («Education and Career») sərgisi açacaq.

Oktyabrın 13-15-də isə Bakıda XV Yubiley Azərbaycan Beynəlxalq Səhiyyə Sərgisi (BİHE) keçiriləcək. Bu sərgi ilə yanaşı IV Azərbaycan Beynəlxalq Stomatologiya Sərgisi («Stomatology Azerbaijan»), III Azərbaycan Beynəlxalq Gözəllik və Estetik Tibb Sərgisi («Beauty Azerbaijan»), həmçinin «Analıq və Uşaqlıq Dövrü» («BabyTime») debüt sərgisi keçiriləcək.

Bundan başqa, oktyabrın 21-24-də Azərbaycan İnşaat Sərgisi (BakuBuild) təşkil olunacaq. Həmin sərgiyə paralel olaraq Beynəlxalq Mebel, İnteryer və Dizayn Sərgisinin («Caspian MebelExpo») keçirilməsi də nəzərdə tutulub.

Noyabrın 4-7-də isə XV Azərbaycan Beynəlxalq Telekommunikasiya və İnformasiya Texnologiyaları Sərgi və Konfransı (Bakutel) keçiriləcək. «Bakutel» sərgisi ilə yanaşı II Xəzər Beynəlxalq Mühafizə, Təhlükəsizlik və Xilasetmə Vasitələri Sərgisi də («CIPS – 2009») keçiriləcək.