Sahibkarlıq

Ana səhifə

Sahibkarlıq

Azərbaycanda daha bir iri partiya «Slavyanka №1» mineral suyu satışdan çıxarılıb

04 sentyabr 2009 15:39 (UTC +04:00)

Bakı. Nicat Mustafayev – APA-Economics. Azərbaycan İqtisadi İnkişaf Nazirliyi yanında İstehlak Bazarına Nəzarət üzrə Dövlət Xidməti satışdan çıxarılmış 1 747 litr «Slavyanka №1» əmtəə nişanlı suyun məhv edilməsi barədə qərar qəbul edib.
Nazirlikdən «APA-Economics»ə verilən məlumata görə, İstehlak Bazarına Nəzarət üzrə Dövlət Xidməti «Slavyanka №1» əmtəə nişanlı suyun istehsal edildiyi sexdəki su çənindən götürülmüş nümunələrin tərkibində bağırsaq çöplərinin normadan artıq olmasının aşkar edilməsi ilə əlaqədar, ticarət dövriyyəsində bu əmtəə nişanı ilə satılan suların keyfiyyətinin yoxlanılması ilə bağlı həyata keçirilən tədbirləri davam etdirir. Belə ki, Dövlət Xidmətinin avqustun sonunda apardığı yoxlamalar zamanı 5 ticarət obyektində aşkar edilərək laborator müayinə üçün nümunələr götürülmüş 1 863,5 litr həcmində «Slavyanka №1» əmtəə nişanlı suyun satışı laborator müayinənin nəticələri bəlli olanadək dayandırılıb.
«Azərsu» Səhmdar Cəmiyyətinin Bakı Su Kəməri İstismar İdarəsinin Mərkəzi kimyəvi-bakterioloji laboratoriyasında aparılmış laborator müayinələrin nəticəsinə əsasən, həmin 4 obyektdən götürülmüş «Slavyanka №1» suyunda bağırsaq çöplərinin miqdarının normadan çox olduğu müəyyən edilib. Bununla əlaqədar satışdan çıxarılmış 1 747 litr «Slavyanka №1» əmtəə nişanlı suyun məhv edilməsi barədə İstehlak Bazarına Nəzarət üzrə Dövlət Xidməti tərəfindən qərar qəbul edilib.
Qeyd edək ki, bir neçə gün öncə 4 tondan artıq «Slavyanka №1» əmtəə nişanlı su da məhv edilib.