Sahibkarlıq

Ana səhifə

Sahibkarlıq

Azərbaycanda kolbasa istehsalçılarının assosiasiyası yaradılıb

07 sentyabr 2009 11:19 (UTC +04:00)

Bakı. Kəmalə Quliyeva - APA. Azərbaycanda kolbasa istehsalı ilə məşğul olan 6 şirkət – “Sevimli dad”, “SAB”, “Kral”, “CF KRİSTAL”, “ELBA 999” və “1000 bərəkət” müəssisələri Ət və Ət Məhsulları Məmulatları İstehsalçılarının Assosiasiyanı yaradıblar. Kolbasa istehsalçılarını bu addımı atmağa son vaxtlar mətbuatda kolbasa məmulatları ilə bağlı gedən yazılar vadar edib. APA-nın məlumatına görə, bu gün keçirdikləri mətbuat konfransında kolbasa istehsalçıları belə məlumatlar nəticəsində müəssisələrinin fəaliyyətinin iflic vəziyyətinə düşdüyünü bildiriblər.
Assosiasiyanın rəhbəri Fuad Qulubəyov bildirib ki, son zamanlar heç bir əsası olmayan məlumatların mediada yer alması sivil yolla işləyən müəssisələrin fəaliyyətinə təsir edib: “Biz bu tədbirə “Məhsullarımıza zəmanət veririk” devizi ilə gəlmişik. Bizim istehsal etdiyimiz kolbasalar istənilən ölkənin kolbasaları ilə rəqabət aparmağa hazırdır”.
F. Qulubəyovun sözlərinə görə, “donuz qripi” ilə bağlı dünyada yaranmış vəziyyətin kolbasa istehsalına heç bir aidiyyəti yoxdur. Belə məlumatların yayılması kolbasa istehsalına xələl gətirmək məqsədi daşıyır.
F. Qulubəyov deyib ki, hələlik assosiasiyaya 6 istehsalçı şirkət üzv olub. Lakin onların sayının 15-ə çatacağı gözlənilir: “Digər kolbasa istehsalçıları da bizə üzv olmaq istəsələr, gərək onların istehsal etdikləri məhsullar bütün sertifikatlara cavab versin”.
“ELBA 999” şirkətinin rəhbəri Elçin Rüstəmov bildirib ki, media ilə kolbasa istehsalçıları partnyorluq münasibətləri əsasında fəaliyyət göstərməlidir: “Bizim hər birimizin beynəlxalq təşkilatlardan sertifikatlarımız var. Əgər haradasa neqativ sexlər fəaliyyət göstərsə, dövlət orqanları onları ifşa etməli və bu sexlərin adı konkret göstərilməlidir. Biz yarım kiloqram sosiska alanın da mənafeyini qoruyuruq”.
“SAB” şirkətinin rəhbəri Elşən Abdullayev isə etiraf edib ki, mətbuatda kolbasaların keyfiyyəti ilə bağlı gedən informasiyalar nəticəsində kolbasa istehsalının həcmi 50-60 faiz azalıb. Nəticədə kolbasa sexlərində işləyən işçilərin sayında da azalma baş verib.