Sahibkarlıq

Ana səhifə

Sahibkarlıq

Azərbaycanın iş adamları Belarusa səfər edib

11 sentyabr 2009 12:34 (UTC +04:00)

Bakı. Laçın Sultanova - APA. Azərbaycan Milli Məclisinin İqtisadi siyasət komitəsinin sədri Ziyad Səmədzadənin başçılıq etdiyi biznesmenlərdən ibarət nümayəndə heyəti Minsk vilayətində (Belarus) səfərdədir.

APA-nın «BELTA»ya istinadən məlumatına görə, sentyabrın 10-dan Minskdə olan Azərbaycan biznesmenləri «Svitanok», «Borisovskiy myasokombinat», «Borisovskiy moloçnıy kombinat» müəssisələrində olublar. Bu gün onlar Belarus Ticarət-Sənaye Palatasının Minsk bölməsinin üzvləri ilə görüşəcək, «Biqz» hipermarketinə və «Evroopt» diskaunterinə baş çəkəcəklər. Səfər sentyabrın 13-nə kimi davam edəcək.

Qeyd edək ki, bu, cavab səfəridir. Bu ilin fevral ayında Minsk vilayət icra komitəsinin sədri Leonid Krupetsin rəhbərlik etdiyi nümayəndə heyəti Azərbaycanda olub. Minsk vilayəti yanvar-iyul aylarında Azərbaycana ixrac etdiyi ət və süd məhsullarının həcmini keçən ilin analoji dövrü ilə müqayisədə 9 dəfə artırıb. Belarusdan Azərbaycana ixrac edilən dərman vasitələrinin həcmi 2 dəfə, qab-qaşığın həcmi 4,5 faiz artıb. İlin əvvəlindən Belarusdan Azərbaycana ixrac edilən malların həcmi 9,1 milyon dollar, Azərbaycandan idxal olunan malların isə həcmi 0,2 faiz təşkil edib. Azərbaycandan Belarusa tərəvəz, meyvə və qoz idxal edilir.