Sahibkarlıq

Ana səhifə

Sahibkarlıq

Bakıda Azərbaycan-Çexiya biznes-forumu keçirilir

24 sentyabr 2009 11:34 (UTC +04:00)

Bakı. Nicat Mustafayev – APA-Economics. Bu gün Bakıda Çexiya Parlamenti Senatının sədri Premısl Sobotkanın Azərbaycana səfəri çərçivəsində Azərbaycan-Çexiya biznes-forumu keçirilir.

«APA-Economics»in məlumatına görə, Azərbaycanda İxracın və İnvestisiyaların Təşviqi Fondu (Azpromo) tərəfindən təşkil olunan forumun açılış mərasimində çıxış edən Azərbaycanın iqtisadi inkişaf naziri Şahin Mustafayev qeyd edib ki, tədbirdə maliyyə, inşaat, sənaye, daşınmaz əmlak, turizm və digər sahələrdə fəaliyyət göstərən 40 Çexiya və 100-ə yaxın Azərbaycan şirkətlərinin nümayəndələri iştirak edir: «Ötən il ərzində iki ölkə arasında ticarət dövriyyəsi 2007-ci illə müqayisədə 7,5% artaraq 21 mln. ABŞ dolları təşkil edib. Bu ilin ilk yeddi ayında isə ticarət dövriyyəsi 12 mln. dollar olub. Azərbaycanla Çexiya arasında ticarət dövriyyəsinin genişlənməsinə baxmayaraq, bu rəqəmin artırılması üçün böyük potensial var və ümid edirəm ki, biznes-forum buna təkan verəcək».

Bundan başqa Azərbaycanın iqtisadi inkişafından danışan Ş.Mustafayev bildirib ki, 2004-2008-ci illər ərzində Azərbaycanda ümumi daxili məhsul (ÜDM) 2,6 dəfə, ÜDM-in adambaşına düşən payı isə 5 dəfə artıb, ölkənin sənaye sektoru 2,8 dəfə genişlənib.

«Bu ilin yanvar-avqust aylarında Azərbaycanda ÜDM-in artım tempi 5% təşkil edib, sənaye sahəsi 6,8%, kənd təsərrüfatı sahəsi 3,8%, rabitə və telekommunikasiya sahəsi 11,6%, əhaliyə göstərilən bank xidmətləri 9,5%, əhalinin gəlirləri 12,6% artıb. İnflyasiyanın səviyyəsi isə 2,6% təşkil edib», - deyə nazir bildirib.

P.Sobotko isə öz növbəsində Çexiyanın iqtisadi potensialından danışıb və qeyd edib ki, Azərbaycanla Çexiya arasında sıx əlaqələrin yaradılması üçün bütün imkanlar mövcuddur.

Bundan başqa, tədbirdə Azpromo, Azərbaycan İnvestisiya Şirkəti, Çexiyanın MDB ölkələri üzrə Ticarət Sənaye Palatasının nümayəndələri təqdimatlar keçirib, Azərbaycan və Çexiyanın investisiya imkanları haqqında ətraflı məlumat veriblər.

Qeyd edək ki, biznes-forum çərçivəsində iki ölkənin iş adamları arasında işgüzar görüşlər keçiriləcək.