Sahibkarlıq

Ana səhifə

Sahibkarlıq

Gəncə-Qazax iqtisadi rayonunda sahibkarlara 1,7 mln. manat güzəştli kredit verilib

25 sentyabr 2009 12:49 (UTC +04:00)

Bakı. Nicat Mustafayev – APA-Economics. Bu gün Gəncədə Azərbaycan İqtisadi İnkişaf Nazirliyinin Sahibkarlığa Kömək Milli Fondu (SKMF) tərəfindən Gəncə-Qazax iqtisadi rayonunda fəaliyyət göstərən sahibkarlar üçün «Regionlarda sahibkarlığın inkişafına dövlət dəstəyi» mövzusunda tədbir keçirilib.

Nazirlikdən «APA-Economics»ə verilən məlumata görə, tədbir çərçivəsində 10 müvəkkil kredit təşkilatı vasitəsilə Gəncə şəhəri, Göygöl, Goranboy, Samux, Daşkəsən, Qazax, Tovuz, Ağstafa və Şəmkir rayonlarında sənaye və kənd təsərrüfatı sahələrində fəaliyyət göstərən 130-a yaxın sahibkara 1,7 mln. manat güzəştli kreditlər verilib. Ayrılmış güzəştli kreditlər hesabına maliyyələşdirilən layihələrin həyata keçirilməsi nəticəsində Gəncə-Qazax iqtisadi rayonunda 260-dan çox yeni iş yerinin yaradılması nəzərdə tutulur. Bununla da, 2009-cu ilin ötən dövrü ərzində SKMF tərəfindən müvəkkil kredit təşkilatları vasitəsilə verilmiş kreditlərin həcmi 95 mln. manata çatıb, güzəştli kredit almış sahibkarlıq subyektlərinin sayı isə 1 560-dan çox olub. Güzəştli kreditlər hesabına maliyyələşdirilən layihələrin həyata keçirilməsi nəticəsində 6 800-dək yeni iş yerinin yaradılması gözlənilir.

Tədbir iştirakçıları həmçinin SKMF-in güzəştli kreditləri hesabına inşa edilmiş «Neon» firmasının 3 min tonluq taxıl anbarında və makaron sexində olub, həmçinin firmanın 10 min ton tutumu olan taxıl məhsullarının təmizlənməsi və saxlanması üzrə müasir anbar kompleksində aparılan tikinti işləri ilə tanış olub.

Tədbirdə çıxış edən SKMF-in icraçı direktoru Şirzad Abdullayev qeyd edib ki, 70%-dək hissəsi Fondun güzəştli kreditləri hesabına olmaqla, regionlarda 13 soyuducu anbar kompleksinin, taxıl məhsullarının təmizlənməsi və saxlanılması üçün isə hər birinin tutumu 10 min ton olan, müasir standartlara cavab verən 20 anbar kompleksinin yaradılması nəzərdə tutulub: «Artıq regionlarda soyuducu anbarların, eləcə də taxıl məhsullarının təmizlənməsi və saxlanılması üçün anbar komplekslərinin tikintisinə başlanıb».

Bundan başqa, tədbir çərçivəsində sahibkarlar üçün «SKMF-in vəsaitləri hesabına güzəştli kreditlərin verilməsi üçün sahibkarlıq subyektləri tərəfindən təqdim edilən investisiya layihələrinin hazırlanması və qiymətləndirilməsi» mövzusunda treninq də keçirilib. Treninqdə 350-dən artıq sahibkar iştirak edib.