Sahibkarlıq

Ana səhifə

Sahibkarlıq

Azərbaycanda zeytun və zeytun yağı istehsalına həsr olunmuş beynəlxalq konfrans keçirilib

07 oktyabr 2009 14:15 (UTC +04:00)

Bakı. Rəşad Süleymanov – APA-Economics. Bu gün Bakıda «Zeytun ağacı və zeytun yağı» adlı beynəlxalq konfrans keçirilib. «APA-Economics»in bildirdiyinə görə, Azərbaycan Sahibkarlar Konfederasiyası (ASK) və Qara Dəniz İqtisadi Əməkdaşlıq Təşkilatının (QDİƏT) Biznes Şurası tərəfindən təşkil olunmuş konfransda Albaniya, Türkiyə və Yunanıstandan da nümayəndə heyətləri iştirak edib.

Konfransda Qara dəniz regionunda zeytun yağı sənayesi sektorunda biznesin təşkili, Xəzər dənizi regionunda zeytunun yetişdirilməsi, zeytun ağacının mənşəyi, onun Xəzər və Aralıq dənizi bölgəsində yayılması, Zeytun Muzeyinin yaradılması və s. mövzularla bağlı məruzələr dinlənilib.

ASK-nın baş katibi Məhəmmədəli Əfəndiyev bildirib ki, son illər Azərbaycanda zeytun və zeytun yağının istehsalına maraq artıb. Yeni zeytun plantasiyaları salınır və yeni ərazilərdə massivlərin salınması istiqamətində iş aparılır. Ekologiya və Təbii Sərvətlər Nazirliyi tərəfindən 1 mln-dan artıq zeytun tingi yetişdirilib ki, bunun da Abşeron ərazisi ilə yanaşı digər bölgələrdə, həmçinin meşə massivlərində əkilməsi nəzərdə tutulur.

Azərbaycan Xarici İşlər Nazirliyinin İqtisadi inkişaf və əməkdaşlıq Departamentinin rəhbəri Altay Əfəndiyev isə tədbirin QDİƏT Biznes Şurası ilə birgə keçirilməsinin məqsədinin bu sahədə birgə fəaliyyətin dəstəklənməsi olduğunu söyləyib.

Türkiyənin Azərbaycandakı səfiri Hülusi Kılıc isə ölkəsinin dünyada zeytun və zeytun yağı istehsalında ilk yerlərdən birini tutduğunu qeyd edib. Səfir Türkiyədə zeytun yağı istehsalı üzrə ixtisaslaşmış şirkətlərin Azərbaycana investisiya yatırmaq, burada fəaliyyət göstərmək niyyətində olduğunu da vurğulayıb: «Bizim şirkətlər Azərbaycan tərəfindən dəvət gözləyir. Dəvət olarsa, türk şirkətləri Azərbaycanda bu sahəyə investisiya yatıra bilər».