Sahibkarlıq

Sahibkarlıq

Azərbaycan Sahibkarlığa Kömək Milli Fondunun yeni əsasnaməsi və vəsaitlərdən istifadə qaydaları təsdiqlənib

08 oktyabr 2009 09:30 (UTC +04:00)

Bakı. Vahab Rzayev – APA-Economics. Azərbaycan prezidenti İlham Əliyev Sahibkarlığa Kömək Milli Fondunun (SKMF) fəaliyyətinin təkmilləşdirilməsi haqqında fərman imzalayıb. Azərbaycan prezidentin mətbuat xidmətindən «APA-Economics»ə verilən məlumata görə, dövlət başçısının fərmanı ilə Fondun əsasnaməsi və vəsaitlərin istifadəsi qaydaları təsdiq edilib.

Fərmana əsasən, məqsədi Azərbaycanda sahibkarlığın, xüsusilə kiçik və orta sahibkarlığın inkişafına və əhalinin işgüzarlıq fəaliyyətinin artırılmasına kömək göstərməkdən, onlara maliyyə dəstəyi verməkdən ibarət olan Fondun ali idarəetmə orqanı onun Müşahidə Şurası hesab olunur. Müşahidə Şurası sədr daxil olmaqla 7 üzvdən ibarət say tərkibində təşkil edilir ki, şuranın 3 üzvü Maliyyə Nazirliyi, Vergilər Nazirliyi, Əmək və Əhalinin Sosial Müdafiəsi Nazirliyi tərəfindən, qalan 4 üzvü İqtisadi İnkişaf Nazirliyi tərəfindən təyin edilir. Qeyd edək ki, Fond İqtisadi İnkişaf Nazirliyi nəzdində fəaliyyət göstərir.

Əsasnaməyə əsasən, SKMF-in vəsaitləri Azərbaycanın dövlət büdcəsinin təxsisatlar, Fondun fəaliyyətindən əldə olunan daxilolmalar, o cümlədən verilmiş güzəştli kreditlər üzrə əsas borc, faiz, cərimə və komissiyon haqqı üzrə ödənişlər, yerli və xarici hüquqi və fiziki şəxslər tərəfindən könüllü verilən ianələr, xarici dövlətlər və beynəlxalq təşkilatlar tərəfindən verilən yardımlar, qrantlar, yerli və xarici maliyyə bazarlarından qanunvericiliyin tələblərinə uyğun olaraq dövlət tərəfindən alınmış kreditlər və qanunvericilikdə nəzərdə tutulan digər mənbələr hesabına formalaşır. Fondun vəsaitinin istifadəsi Azərbaycan prezidenti tərəfindən müəyyən edilən qaydalara uyğun olaraq həyata keçirilir.

Qeyd edək ki, Fondun cari fəaliyyətinə iqtisadi inkişaf naziri tərəfindən vəzifəyə təyin edilən və vəzifədən azad edilən SKMF-ə həvalə edilmiş vəzifələrin yerinə yetirilməsi üçün birbaşa məsuliyyət daşıyan icraçı direktor rəhbərlik edir.

Fondun vəsaitlərinin istifadəsi qaydalarına əsasən, vəsaitlərin sahibkarlıq subyektlərinə çatdırılması müvəkkil banklar və bank olmayan kredit təşkilatları (müvəkkil kredit təşkilatları) vasitəsilə onların öz adından və öz riskləri hesabına həyata keçirilir. Müvəkkil kredit təşkilatları ilə Fond arasında vəsaitlərin istifadə şərtlərini nəzərdə tutan müqavilə imzalanır. Qeyd edək ki, verilmiş güzəştli kreditlər üzrə Fondun hesabına ödənilmiş faizlər, cərimələr və komisyon haqlar xüsusi vəsaitlər formasında toplanır və həmin vəsaitlərin 10%-i Fondun maddi-texniki bazası və işçilərin sosial müdafiəsinin gücləndirilməsinə yönəldilə bilər.

Müvəkkil bankların Fonddan cəlb etdikləri vəsaitlərin ümumi məbləğinin qalığı onların məcmu kapitallarının 100%-dək ola bilər. Böyük və iri həcmli layihələrin maliyyələşdirilməsi zamanı bu məhdudiyyət müvəkkil bankların məcmu kapitallarının 150%-dək artırıla bilər. Bank olmayan kredit təşkilatlarının cəlb etdikləri vəsaitlərin ümumi məbləğinin qalığı isə onların nizamnamə kapitallarının 100%-dək ola bilər.

Sahibkarlıq subyektlərinə Fondun vəsaitlərindən aşağıdakı hədlərdə güzəştli kredit vəsaiti verilə bilər:
- 10 000 manatdan 50 000 manatadək — kiçik həcmli kreditlər;
- 50 001 manatdan 250 000 manatadək — orta həcmli kreditlər;
- 250 001 manatdan 1 000 000 manatadək — böyük həcmli kreditlər;
- 1 000 001 manatdan 5 000 000 manatadək — iri həcmli kreditlər.

Hər bir sahibkarlıq subyektinin Fondun vəsaitləri hesabına aldığı güzəştli kreditin maksimum həddi 5 mln. manatdan artıq ola bilməz.

Fondun güzəştli kreditlərinin müddətləri aşağıdakı kimi müəyyən edilir:

- kiçik həcmli kreditlər üçün - 2 (iki) ilədək;
- orta həcmli kreditlər üçün - 3 (üç) ilədək;
- böyük həcmli kreditlər üçün - 5 (beş) ilədək;
- iri həcmli kreditlər üçün -7 (yeddi) ilədək.

Fondun kreditlərinin illik faiz dərəcələri aşağıdakı kimi müəyyən edilir:

- KİV-in inkişafı layihələrinin maliyyələşdirilməsi üçün - 0,5%;
- digər layihələrin maliyyələşdirilməsi üçün – 1%.

Öz növbəsində müvəkkil kredit təşkilatlarının Fondun kreditlərinə tətbiq etdiyi illik faiz dərəcəsinin ən yüksək həddi göstərilmiş faizlər də daxil olmaqla, cəmi kredit məbləğinin 6%-dən (KİV-in inkişafı üzrə layihələrin maliyyələşdirilməsi üzrə kredit məbləğinin 4%-dən) artıq olmamalıdır.