Sahibkarlıq

Ana səhifə

Sahibkarlıq

Azərbaycanda SKMF tərəfindən vəsaitlərin verilməsi mexanizmi sadələşdirilib

13 oktyabr 2009 15:56 (UTC +04:00)

Bakı. Nicat Mustafayev – APA-Economics. Bu gün Azərbaycan İqtisadi İnkişaf Nazirliyində Azərbaycan Mərkəzi Bankının, Sahibkarlığa Kömək Milli Fondunun (SKMF) və müvəkkil kredit təşkilatlarının nümayəndələrinin iştirakı ilə Fondun fəaliyyətinin təkmilləşdirilməsində mühüm rol oynayacaq sənədlərlə bağlı tədbir keçirilib.

Nazirlikdən «APA-Economics»ə verilən məlumata görə, tədbirdə çıxış edən iqtisadi inkişaf nazirinin müavini Niyazi Səfərov qeyd edib ki, qeyri-neft sektorunun inkişafı, özəl bölməyə dövlət dəstəyinin gücləndirilməsi, yeni iş yerlərinin və müəssisələrin yaradılması, əhalinin sosial rifah halının daha da yaxşılaşdırılması həyata keçirilən iqtisadi siyasətin prioritetlərindəndir: «Ölkədə iqtisadiyyatın aparıcı sahələrindən olan sahibkarlığa diqqət və qayğı göstərilir. Təsadüfi deyil ki, Azərbaycanda güclü sahibkarlar təbəqəsi formalaşıb, özəl bölmənin ÜDM-dəki xüsusi çəkisi 85%-ə çatıb. Ölkədə özəl bölmənin inkişafına dövlət maliyyə dəstəyinin gücləndirilməsi, güzəştli kreditlərin səmərəliliyinin artırılması, bu sahədə beynəlxalq təcrübənin öyrənilməsi və tətbiqi istiqamətində kompleks sistemli tədbirlər həyata keçirilir». Nazir müavini onu da bildirib ki, «SKMF-nin fəaliyyətinin təkmilləşdirilməsi haqqında» prezident sərəncamı Azərbaycanda özəl bölmənin inkişafını daha da sürətləndirəcək, sahibkarlıq fəaliyyətinin genişlənməsinə təkan verəcək.

SKMF-nin icraçı direktoru Şirzad Abdullayev təqdimatla çıxış edərək, Fondun yeni Əsasnaməsinin və vəsaitlərinin istifadəsi Qaydalarının üstünlükləri barədə tədbir iştirakçılarına geniş məlumat verib. Ş.Abdullayev qeyd edib ki, Fondun yeni Əsasnaməsi və vəsaitlərinin istifadəsi Qaydaları sahibkarların investisiya layihələrinin maliyyələşdirilməsində operativliyin təmin edilməsində, vəsaitlərin yerləşdirilməsinin səmərəliliyinin artırılmasında, sahibkarların dövlətin güzəştli kreditlərinə çıxış imkanlarının genişləndirilməsində, xüsusilə də sahibkarların hüquqlarının müdafiəsinin gücləndirilməsində böyük əhəmiyyətə malikdir: «Yeni normativ-hüquqi sənədlər sahibkarların investisiya layihələrinin iqtisadiyyatın prioritet istiqamətlərinə uyğun maliyyələşdirilməsini, Fondun fəaliyyətində və güzəştli kreditləşdirmədə şəffaflığın artırılmasını, iqtisadi cəhətdən daha səmərəli layihələrin müəyyənləşdirilməsini təmin edəcək».

Ş.Abdullayevin sözlərinə görə, qaydalara uyğun olaraq SKMF-nin vəsaitlərinin verilməsi mexanizmi sadələşdirilib. Belə ki, güzəştli kreditlərin maksimal faiz dərəcəsi 6%-dək, müraciətin təmin olunması müddəti 25 günədək azaldılıb, kreditlərin maksimal məbləği isə 5 mln. manata çatdırılıb: «Bütün bunlar ölkədə, xüsusilə regionlarda sahibkarlığın inkişafını stimullaşdırmaqla özəl bölmənin inkişafının daha da sürətləndirilməsində, yeni texnologiyaların tətbiqində, rəqabət qabiliyyətli və ixrac yönümlü məhsul istehsalının artmasında əhəmiyyətli olacaq».