Sahibkarlıq

Sahibkarlıq

Azərbaycanda sahibkarlığın inkişafına həsr olunmuş növbəti regional tədbir keçirilib

15 oktyabr 2009 12:25 (UTC +04:00)

Bakı. Nicat Mustafayev – APA-Economics. Bu gün Azərbaycan İqtisadi İnkişaf Nazirliyinin Sahibkarlığa Kömək Milli Fondu (SKMF) «Regionlarda sahibkarlığın inkişafına dövlət dəstəyi» mövzusunda Ağcabədi rayonunda növbəti tədbir keçirib.

Nazirlikdən «APA-Economics»ə verilən məlumata görə, tədbirdə çıxış edən SKMF-in icraçı direktoru Şirzad Abdullayev bildirib ki, Fondun yeni əsasnaməsi və vəsaitlərinin istifadəsi qaydaları sahibkarların investisiya layihələrinin maliyyələşdirilməsində operativliyin təmin edilməsində, vəsaitlərinin yerləşdirilməsinin səmərəliliyinin artırılmasında, dövlətin güzəştli kreditlərinə çıxış imkanlarının genişləndirilməsində, xüsusilə də sahibkarların hüquqlarının müdafiəsinin gücləndirilməsində böyük əhəmiyyətə malikdir. «Qaydalara uyğun olaraq, Fondun vəsaitlərinin verilməsi mexanizmi sadələşdirilib, güzəştli kreditlərin maksimal faiz dərəcəsi 6%-dək, müraciətin təmin olunması müddəti 25 günədək azaldılıb, kreditlərin maksimal məbləği isə 5 mln. manata çatdırılıb».

Tədbir çərçivəsində müvəkkil kredit təşkilatları vasitəsilə Ağcabədi, Füzuli, Beyləqan, Zərdab, Bərdə, Yevlax, İmişli, Ucar, Biləsuvar və Neftçala rayonlarında kənd təsərrüfatı sahəsində fəaliyyət göstərən 100-dən çox sahibkara 1 mln. manata yaxın güzəştli kreditlər verilib. Ayrılmış kreditlər hesabına maliyyələşdirilən layihələrin həyata keçirilməsi nəticəsində bu rayonlarda 150-dən artıq yeni iş yerinin yaradılması nəzərdə tutulur.

Qeyd edək ki, Ağcabədidə keçirilmiş tədbir də daxil olmaqla, 2009-cu ilin ötən dövrü ərzində SKMF tərəfindən müvəkkil kredit təşkilatları vasitəsilə verilmiş güzəştli kreditlərin həcmi 103,2 mln. manat təşkil edib, güzəştli kreditlər almış sahibkarlıq subyektlərinin sayı isə 1 800-dən çox olub. Güzəştli kreditlər hesabına maliyyələşdirilən layihələrin həyata keçirilməsi nəticəsində 7 200-dən artıq yeni iş yerlərinin yaradılması gözlənilir.