Sahibkarlıq

Sahibkarlıq

Azərbaycanda vergi cinayətlərinə görə axtarışda olan 28 nəfər həbs edilib

16 oktyabr 2009 13:49 (UTC +04:00)

Bakı. Rəşad Süleymanov – APA-Economics. Cari ilin yanvar-sentyabr ayları ərzində Azərbaycan Vergilər Nazirliyi tərəfindən vergidən yayınma, qanunsuz sahibkarlıq və başqa faktlarla bağlı materiallar üzrə 180 cinayət işi başlanıb ki, bu da 2008-ci ilin eyni dövründə başlanmış cinayət işlərinin sayından 39 iş çoxdur. Bu barədə «APA-Economics»ə Vergilər Nazirliyinin ictimaiyyətlə əlaqələr şöbəsindən məlumat verilib.

Hesabat dövründə ibtidai istintaqı tamamlanmış 126 cinayət işindən vergiləri ödəməkdən yayınmaya görə 31 iş, qanunsuz sahibkarlığa görə 11 iş, aksiz markası ilə markalanmalı olan məhsulların belə marka olmadan satış məqsədilə əldə edilməsinə görə 7 iş, özgə əmlakını dələduzluq yolu ilə ələ keçirməyə görə 1 iş və özgə əmlakını mənimsəməyə görə 1 iş, cəmi 69 nəfər barəsində 51 cinayət işi baxılması üçün aidiyyəti məhkəmələrə göndərilib.

Bir sıra müəssisələrin rəhbərləri və fiziki şəxslər yayındırdıqları vergiləri ibtidai istintaq zamanı tamamilə ödədiklərinə görə barələrində olan 51 cinayət işinə xitam verilib. İstintaqı tamamlanmış cinayət işləri üzrə vurulmuş ziyandan 8 mln. 273 min manat, cinayət işi başlanması rədd edilmiş materiallar üzrə isə 1 mln. 840 min manat, cəmi 10 mln. 113 min manat məbləğində vəsaitin dövlət büdcəsinə ödənilməsi təmin olunub. Bu da 2008-ci ilin eyni dövrü ilə müqayisədə dövlət büdcəsinə ödətdirilmiş vəsaitdən 2 mln. 088 min manat və ya 1,4 dəfə çoxdur.

Hesabat dövründə vergiləri ödəməkdən yayınma və qanunla istintaqı vergi orqanlarının səlahiyyətinə aid olan digər cinayətlər törətmiş 38 nəfər təqsirləndirilən şəxs barəsində məhkəmələr tərəfindən həbs qətimkan tədbiri seçilib. Daxil olmuş əməliyyat məlumatları və müraciətlər üzrə müvafiq araşdırmalar aparılaraq, 98 şəxs haqqında toplanmış materiallar vergi qanunvericiliyinə uyğun olaraq tədbirlər görülməsi üçün aidiyyəti vergi orqanlarına göndərilib. Vergi orqanlarının üzərinə düşən vəzifələrin icrasına köməklik göstərilməsi ilə bağlı vergi yoxlamalarından yayınan 74 nəfər vergi ödəyicisi tapılaraq aidiyyəti vergilər idarələrinə təqdim edilib.

Yanvar-sentyabr aylarında cinayət işləri üzrə verilmiş istintaq və əməliyyat tapşırıqları üzrə keçirilmiş müvafiq əməliyyat-axtarış tədbirləri nəticəsində vergi cinayətləri törətdiklərinə görə barələrində axtarış elan edilən 28 şəxs tutularaq Departamentin İstintaq şöbəsinə təhvil verilib. İbtidai istintaqdan yayınan 128 şəxsin məcburi qaydada gətirilməsi təmin olunub.