Sahibkarlıq

Ana səhifə

Sahibkarlıq

Azərbaycan və Ukrayna iş adamları arasında ikitərəfli görüşlər keçirilib

20 oktyabr 2009 14:56 (UTC +04:00)

Bakı. Nicat Mustafayev – APA-Economics. Bu gün Azərbaycan İqtisadi İnkişaf Nazirliyində Ukraynanın Sumsk vilayətinin dövlət rəsmiləri və sahibkarlarından ibarət nümayəndə heyətinin Azərbaycana səfəri çərçivəsində yerli və ukraynalı iş adamları arasında dəyirmi masa keçirilib.

İqtisadi İnkişaf Nazirliyindən «APA-Economics»ə verilən məlumata görə, tədbirdə Azərbaycan və Ukrayna tərəfdən dövlət rəsmiləri ilə yanaşı, kənd təsərrüfatı, bank sektoru, tikinti və digər sahələrdə fəaliyyət göstərən iş adamları iştirak edib.

Dəyirmi masada çıxış edən İqtisadi İnkişaf Nazirliyinin Aparat rəhbəri Samir Vəliyev Azərbaycanda keçirilən sosial-iqtisadi islahatlar və əldə edilmiş uğurlar barədə məlumat verib və qeyd edib ki, sahibkarlığa dövlət maliyyə dəstəyinin gücləndirilməsi, iş adamlarının işgüzar əlaqələrinin genişləndirilməsi və sahibkarlığın məsləhət, informasiya təminatının yaxşılaşdırılması istiqamətində həyata keçirilmiş tədbirlər nəticəsində ölkədə əlverişli biznes mühiti formalaşıb, sahibkarlıq daha da inkişaf edib.

Azərbaycan və Ukrayna arasındakı iqtisadi əlaqələr barədə məlumat verən S.Vəliyev iki ölkə arasında iqtisadi əlaqələrin inkişaf etdiyini, əməkdaşlığın daha da genişləndirilməsi üçün real imkanların olduğunu vurğulayıb.

Öz növbəsində Sumsk vilayətinin Dövlət Administrasiyasının sədr müavini Aleksandr Tsupro «Sumsk vilayətinin iqtisadi potensialı və investisiya imkanları» mövzusunda təqdimatla çıxış edib.

Tədbirdə həmçinin Azərbaycan və Sumsk vilayətindən olan sahibkarlar arasında ikitərəfli görüşlər keçirilib.