Sahibkarlıq

Ana səhifə

Sahibkarlıq

Azərbaycanda hüquqi şəxslərin sayı ilin əvvəlindən 4,5% artıb

23 oktyabr 2009 14:00 (UTC +04:00)

Bakı. Nicat Mustafayev – APA-Economics. Bu ilin yanvar-sentyabr ayları ərzində Azərbaycanda hüquqi şəxslərin sayı 4,5% artaraq oktyabrın 1-nə 89 960 təşkil edib.

Dövlət Statistika Komitəsindən «APA-Economics»ə verilən məlumata görə, artım iqtisadiyyatın «Digər sahələrdə xidmətlərin göstərilməsi», «Su təchizatı: Çirkli suların və tullantıların təmizlənməsi», «Daşınmaz əmlakla əlaqədar əməliyyatlar», «Təhsil» və «Tikinti» bölmələrində daha nəzərəçarpacaq dərəcədə olub.

«Topdan və pərakəndə ticarət; avtomobillərin və motosikletlərin təmiri», «Kənd təsərrüfatı, meşə təsərrüfatı və balıqçılıq», «Tikinti», «Digər sahələrdə xidmətlərin göstərilməsi» və «Emal sənayesi» bölmələrində cəmləşən hüquqi şəxslərin Dövlət registrində xüsusi çəkisi daha yüksək olub. Xüsusi mülkiyyətdə olan müəssisə və təşkilatların əsas hissəsi isə «Topdan və pərakəndə ticarət; avtomobillərin və motosikletlərin təmiri» (37,7%), «Kənd təsərrüfatı, meşə təsərrüfatı və balıqçılıq» (13,4%), «Digər sahələrdə xidmətlərin göstərilməsi» (11,5%), «Tikinti» (10,1%), «Emal sənayesi» (7,5%) və «İnzibati və yardımçı xidmətlərin göstərilməsi» (5,4%) bölmələrinin payına düşür.

Statistik vahidlərin Dövlət registrində qeydiyyatdan keçmiş tam xarici investisiyalı və birgə müəssisələr daha çox Türkiyə, Böyük Britaniya, Rusiya, ABŞ, İran və Almaniya sahibkarların tərəfindən yaradılıb.

Bununla yanaşı, 2009-cu ilin yanvar-sentyabr ayları ərzində ləğv edilmiş müəssisələrin 22,8%-i «İnformasiya və rabitə», 12,6%-i «Topdan və pərakəndə ticarət; avtomobillərin və motosikletlərin təmiri», 8,5%-i «Emal sənayesi», hər birində 7,7% olmaqla «Tikinti» və «Digər sahələrdə xidmətlərin göstərilməsi», 7,3%-i «Nəqliyyat və anbar təsərrüfatı», hər birində 6,9% olmaqla «Elektrik enerjisi, qaz, buxar və kondisiyalaşdırılmış hava ilə təchizat» və «Peşə, elmi və texniki fəaliyyət», qalanları isə digər bölmələrin payına düşür.

Bu dövrdə yeni yaradılmış müəssisələrin 28,5%-i «Digər sahələrdə xidmətlərin göstərilməsi», 24,3%-i «Topdan və pərakəndə ticarət; avtomobillərin və motosikletlərin təmiri», 13,9%-i «Tikinti», 5,8%-i «Peşə, elmi və texniki fəaliyyət», 5,4%-i «İnzibati və yardımçı xidmətlərin göstərilməsi», 4,4%-i «Emal sənayesi», 4,2%-i isə «Kənd təsərrüfatı, meşə təsərrüfatı və balıqçılıq» bölmələrinin payına düşür.

Cari ilin doqquz ayında qeydiyyatdan keçmiş yeni müəssisələrin 85,5%-i xüsusi mülkiyyətli, 3,8%-i dövlət mülkiyyətli, 8,2%-i tam xarici investisiyalı, 2,5%-i isə birgə müəssisələrin payına düşür.

Bu dövr ərzində Bakı şəhəri üzrə 90, Aran iqtisadi rayonu üzrə 42, Gəncə-Qazax iqtisadi rayonu üzrə 27, Şəki-Zaqatala iqtisadi rayonu üzrə 20, Naxçıvan iqtisadi rayonu üzrə 16, Lənkəran iqtisadi rayonu üzrə 15, Abşeron və Quba-Xaçmaz iqtisadi rayonlarının hər biri üzrə isə 12 müəssisə ləğv edilərək Statistik vahidlərin Dövlət registrindən çıxarılıb.