Sahibkarlıq

Ana səhifə

Sahibkarlıq

Azərbaycan Əmlak Məsələləri Dövlət Komitəsində kollegiya iclası keçirilib

26 oktyabr 2009 14:15 (UTC +04:00)

Bakı. Rəşad Süleymanov – APA-Economics. Azərbaycan Əmlak Məsələləri Dövlət Komitəsində yanvar-sentyabr ayları ərzində görülmüş işlərə dair kollegiya iclası keçirilib. Bu barədə «APA-Economics»ə Dövlət Komitəsinin mətbuat xidmətindən məlumat verilib.

Komitə sədri Kərəm Həsənov bildirib ki, ötən dövrdə dövlət əmlakının idarə edilməsini və özəlləşdirilməsini, daşınmaz əmlaka dair hüquqların dövlət qeydiyyatı, kadastrı və ünvan reyestrinin aparılması sahələrini tənzimləyən normativ-hüquqi bazanın təkmilləşdirilməsi ilə bağlı 20-yə yaxın normativ-hüquqi sənədin layihələri hazırlanıb.

İclasda dövlət əmlakının idarə edilməsinin effektivliyinin artırılması, onun qorunub saxlanılması və təyinatı üzrə istifadə olunması, habelə dövlət mülkiyyətində olan torpaq sahələrinin istifadə vəziyyətinin araşdırılması, dövlət müəssisələrinin özəlləşdirmədən sonrakı fəaliyyətinin monitorinqinin aparılması, müəssisələrdən hesabatların və inventarlaşdırma aktlarının alınması və təhlili istiqamətində işlər həyata keçirildiyi də bildirilib.

İclasda məlumat verilib ki, cari ildə dövlət müəssisələri və nizamnamə kapitalında dövlətin payı olan səhmdar cəmiyyətlərində dövlət əmlakının mövcudluğu, dövlət büdcəsinə çatacaq dividendlərin hesablanılması və ödənilməsi vəziyyətinin araşdırılması məqsədi ilə 270-ə yaxın monitorinq aparılıb. Nizamnamə kapitalında dövlət payı olan səhmdar cəmiyyətlərindən 341 balans hesabatı və 361 inventarlaşdırma aktı qəbul edilib. Komitənin sərəncamında olan dövlət müəssisələrindən isə 181 balans hesabatı və 186 inventarlaşdırma aktı qəbul olunub. Özəlləşdirmədən sonra alqı-satqı müqaviləsinin şərtlərinə əməl olunması və fəaliyyət profilinin saxlanılması ilə bağlı özəlləşdirilmiş 70-ə yaxın sosial təyinatlı obyektdə monitorinqlər aparılıb.

Cari ilin oktyabr ayının 1-i vəziyyətinə 6 273 hüquqi şəxs statuslu dövlət müəssisələri və onların 4 626 filiallarının (cəmi 10 899) malik olduğu 120 687 daşınmaz əmlakları barədə məlumatlar Registrdə qeydiyyata alınıb.

İclasda özəlləşdirmənin daha da sürətləndirilməsi, dövlət əmlakının özəlləşdirilməsi və icarəsindən daxilolmaların artırılması, dövlət əmlakının idarə edilməsinin təkmilləşdirilməsinin vacibliyi vurğulanıb.