Sahibkarlıq

Sahibkarlıq

Azərbaycan İnvestisiya Şirkəti noyabrın 1-dən sahibkarlardan investisiya layihələrinin qəbuluna başlayır

27 oktyabr 2009 14:54 (UTC +04:00)

Bakı. Nicat Mustafayev – APA-Economics. Azərbaycan İnvestisiya Şirkəti (AİŞ) iqtisadiyyatın sahələri üzrə prioritet istiqamətlərə uyğun olaraq, investisiya layihələrinin maliyyələşdirilməsi məqsədilə yaxın günlərdə sahibkarlıq subyektlərindən investisiya layihələrinin (təkliflərin) qəbuluna başlayır.
AİŞ-dən «APA-Economics»ə verilən məlumata görə, investisiya layihələrinin sırasına kənd təsərrüfatı məhsullarının emalı üzrə kiçik və orta həcmli müəssisələrin və ya emal sahələrinin yaradılması, müxtəlif çeşidli qablaşdırma məhsulları (tara) istehsalı (karton, alüminium (tənəkə) və ya plastik tara), alternativ enerji mənbələrinin yaradılması (külək, günəş, hidro və bio) daxildir.
Sahibkarların investisiya layihələrinin qiymətləndirilməsində istehsal olunacaq məhsulların keyfiyyəti, rəqabətə davamlılığı, əsasən ixracyönümlü və idxalı əvəzedici olması, layihənin reallaşdırılması müddəti və iqtisadi səmərəliliyi, layihənin dəyəri, avadanlıqların texniki xüsusiyyətləri, sanitar-texniki və ekoloji keyfiyyətləri, istifadə və xidmət imkanları, analoji layihələr üzrə təcrübə, kadr potensialı, fəaliyyət sahəsinin əlverişli təbii-coğrafi mövqeyi, nəqliyyat qovşaqlarına yaxınlığı və s. kimi meyarlar əsas götürüləcək.
Qəbul olunmuş investisiya layihələri sahibkarların öz vəsaiti, AİŞ və ya onun törəmə şirkətlərinin vəsaiti, həmçinin Sahibkarlığa Kömək Milli Fondunun güzəştli kreditləri hesabına maliyyələşdirilə bilər. Təqdim olunmuş investisiya layihələrinin maliyyələşdirilməsində AİŞ sərmayəçi kimi iştirak edir və investisiya obyektinin nizamnamə kapitalında üstün iştirak payına malik ola bilməz.
İnvestisiya layihələri iqtisadi və maliyyə baxımından əsaslandırılmış və Azərbaycan dilində təqdim olunmalıdır. Həmçinin layihənin qiyməti manatla göstərilməlidir.

İnvestisiya layihələrinin qəbuluna cari ilin noyabrın 1-dən başlanacaq.

Əlaqə telefonu: (+994 12) 437-29-09.