Sahibkarlıq

Ana səhifə

Sahibkarlıq

Noyabrın sonunda Bakıda “İnsan kapitalı. Dövlət. Biznes” adlı beynəlxalq konfrans keçiriləcək

06 noyabr 2009 12:48 (UTC +04:00)

Bakı – APA-Economics. Bu il noyabrın 25-26-da Bakıda “İnsan kapitalı. Dövlət. Biznes” adlı I Beynəlxalq Konfrans keçiriləcək. Bu barədə “APA-Economics”ə konfransın əsas təşkilatçısı olan “Allianz Group”dan məlumat verilib.

Məlumata görə, konfransın proqramına uyğun olaraq, təcrübi-tətbiqi məruzələr ediləcək, master-klaslar təşkil olunacaq, dəyirmi masalar keçiriləcək.

Konfransın Təşkilat Komitəsinin yaydığı açıqlamada bildirilir ki, insan resursları siyasətinin və texnologiyalarının biznesin inkişafına və bununla bağlı digər göstəricilərə təsiri heç kimdə şübhə doğurmur: “Amma bu siyasətin gerçəkləşdirilməsində və şirkətin insan resurslarının idarə edilməsi məsələlərində bir sıra problemlər meydana çıxır. Rəqabət şəraitində personal problemi daha böyük əhəmiyyət kəsb edir – indi o, şirkətin uzunmüddətli inkişafı üçün başlıca əsasdır. Bu problemi uğurla həll etmək üçün müəssisələr personalın inkişafına və təhsilinə getdikcə daha çox diqqət yetirməyə başlayıb.

Hazırda Rusiyada kadr menecmenti sahəsində xidmətlər və qərarlar üzrə təkliflərə maraq sürətlə artır, şirkətlər isə beynəlxalq standartlarla tanış olmağa və bu bilikləri öz işlərində tətbiq etməyə çalışır.

Bu ilin iyun ayında Moskvada Azərbaycanın aparıcı konsaltinq şirkəti olan “Allianz Group”un “İnsan resursları məktəbi”nin məzunları ilə keçirilən görüşdən sonra bu yeni və lazımlı tədbiri birlikdə Bakıda təşkil etmək ideyası yaranıb. Axı Azərbaycanda həm gənc, həm də təcrübəli mütəxəssislərin personalın idarəetməsi ilə bağlı bir sıra məsələlər hələ də açıq qalır və müxtəlif fikirlər səslənir. Bu səbəbdən təcrübə mübadiləsi aparmaq, kadr bazarındakı vəziyyəti izləmək və yeni texnologiyalardan öz müəssisələrimizdə istifadə etmək çox vacibdir.

Rusiya və Azərbaycan ayrı-ayrı dövlətlər olsalar da, qarşılıqlı anlayış, dostluq və peşəkar dəstək unikal proqram hazırlamağa, MDB və Avropanın aparıcı şirkət və strukturlarından ən yaxşı mütəxəssis və ekspertləri dəvət etməyə imkan yaradıb: «Bizim işimizin keyfiyyəti, əhəmiyyəti və lazımlılığı Azərbaycan Rabitə və İnformasiya Texnologiyaları Nazirliyi Beynəlxalq Əlaqələr və Hesablamalar Mərkəzinin, eləcə də aparıcı yerli banklardan olan «Accessbank»ın dəstəyində də özünü göstərir».

Qeyd edək ki, konfransın Təşkilat Komitəsinin yaydığı bəyanatı Ülvi Ağayev (“Allianz Group”), Yelena Şulgina və Natalya Krasnova imzalayıblar.

Beynəlxalq tədbir haqda əlavə məlumat almaq və konfransda qeydiyyatdan keçmək üçün “İnsan kapitalı. Dövlət. Biznes” I Beynəlxalq Konfransının meneceri Səfiyə Nizaməddinovaya müraciət etmək olar:
http://allianzgroup.az/conference
[email protected]
Tel.: 465 00 36/37, Mob.: + 99 455 276 76 00

APA İnformasiya Agentliyi beynəlxalq konfransın təşkilatçıları tərəfindən tədbirin rəsmi informasiya tərəfdaşı seçilib.