Sahibkarlıq

Ana səhifə

Sahibkarlıq

“BIS Group” “Ağıllı ev” bazarına yeni mühafizə sistemini təqdim edib

06 noyabr 2009 14:47 (UTC +04:00)

Bakı. Aynur Vəliyeva - APA-Economics. “BIS Group” şirkətlər qrupu “Ağıllı ev” bazarına yeni “Protector” adlı mühafizə sistemini təqdim edib.

Şirkətin baş ofisindən «APA-Economics»ə verilən məlumata görə, avadanlığın əsas əhəmiyyəti ev, ofis və məişət avadanlıqlarını 100% təhlükəsizliyini təmin etməkdədir. Şirkətin marketinq və satış üzrə meneceri Ramil Əliyevin sözlərinə görə, evlərdə baş verə biləcək qaz sızıntısı, su basması, oğurluq, elektrik qısaqapanması və s. hallarda işə düşərək təhlükəni sovuşdurur və ev sahibi ilə yanaşı eyni zamanda 8 ayrı mobil telefona zəng edərək səsli mesaj vasitəsilə yaranmış təhlükədən xəbər verir. Hətta ev sahibi evdə olmadığı zaman belə elektrik cərəyanı kəsildiyi halda “Protector” onun mobil telefonuna evdə işığın olmadığı barədə mesaj göndərir. “Protector Ağıllı Ev Sistemi”ni istifadəçi hər zaman SMS ilə və ya internetlə idarə edə bilər.

R.Əliyevin sözlərinə görə, “Protector” kompüterə bağlı olaraq çalışmadığına görə elektrik cərəyan kəsildiyi zaman belə ev və avadanlıqlar tam olaraq qorunur, istifadəçi əmrləri verə bilir. Bir çox üstünlüklərə malik olan bu sistemin qiyməti bazarda təqdim edilən analoji sistemlərdən 10 dəfə aşağıdır. Nanotexnologiya üzərində hazırlanmış “Protector”a hətta ömürlük zəmanət vermək mümkündür. Həmçinin avadanlığın üstünlüyü ondan ibarətdir ki, sistemə istənilən sayda detektor və sensor əlavə olaraq qoşmaq olar.

Şirkət menecerinin sözlərinə görə, elektrik cərəyanını 1/5.000.000.000 saniyədə kontrol edə və tənzimləyə biləcək ikinci bir avadanlıq yoxdur. Ev təmirlidirsə, orada Kabelsiz (Wireless) Protector Sistemi tətbiq oluna bilər.

Avadanlığı nəğd və kredit şərti ilə əldə etmək olar. Eyni zamanda avadanlığı sifariş etdikdə, ev Qarant Sığorta tərəfindən 100 min manat dəyərində tam sığortalanır. Ev sahibinin hətta 3-cü şəxslər qarşısında tam məsuliyyəti sığortalanır.