Sahibkarlıq

Sahibkarlıq

Xəzər Beynəlxalq İnvestisiya Şirkəti gələn ilin əvvəlində yeni layihələrə baxacaq

10 noyabr 2009 08:48 (UTC +04:00)

Bakı. Nicat Mustafayev – APA-Economics. Gələn ilin əvvəlində Xəzər Beynəlxalq İnvestisiya Şirkəti (Caspian International Investment Company - CIIC) Müşahidə Şurasının iclası keçiriləcək. «APA-Economics»in məlumatına görə, bu barədə şirkətin icraçı direktoru Toğrul Köçərli məlumat verib.

Onun sözlərinə görə, 2010-cu ilin yanvar ayına nəzərdə tutulmuş Müşahidə Şurasının iclasında üç yeni layihənin baxılacağı gözlənilir: «Layihələr əsasən kənd təsərrüfatı və qida məhsullarının istehsalı sahələrini əhatə edir».

T.Köçərli qeyd edib ki, iclasda həmçinin cari məsələlər, hazırda icra olunan və artıq təsdiqlənən layihələrə də baxılıb müzakirələr aparılacaq.

Qeyd edək ki, Azərbaycan İnvestisiya Şirkəti (AİŞ) və Özəl Sektorun İnkişafı üzrə İslam Korporasiyasının (ICD - İslam İnkişaf Bankının struktur vahidi) birgə təsis etdiyi CIIC bu ilin mart ayında Azərbaycanda dövlət qeydiyyatına alınıb. Şirkət əsasən logistika, aqro-biznes, biznes və ticarət mərkəzlərin inşası, ofis mebeli istehsalı, mehmanxana və soyuducu anbarların tikintisi sahələrinə maraq göstərir. Şirkətin səhm kapitalı 2,95 mln. manat (3,6 mln. ABŞ dolları) təşkil edir.

Xatırladaq ki, Xəzər Beynəlxalq İnvestisiya Şirkəti 2007-ci ilin noyabr ayında ICD və AİŞ-in iştirakı ilə təsis edilib. Müştərək investisiya şirkəti şəriət prinsiplərinə zidd fəaliyyət göstərən müəssisələr (spirtli içkilərin, donuz əti məhsullarının istehsalı), habelə ənənəvi maliyyələşdirmə və sığorta xidmətlərini göstərən banklar və sığorta təşkilatları istisna olmaqla, Azərbaycan iqtisadiyyatının qeyri-neft sektorundakı müəssisələrə investisiya qoymaq hüququna malikdir.

Müştərək investisiya şirkətinin nizamnamə kapitalının yekun miqdarı iki il ərzində 70 mln. ABŞ dolları təşkil edəcək. AİŞ-in müştərək investisiya şirkətinin nizamnamə kapitalında iştirak payı həmin müddət ərzində 14 mln. dollar məbləğində olmaqla, şirkətin səhmlərinin 20%-ni təşkil edəcək. Eyni zamanda, layihəyə bir sıra ərəb ölkələrinin özəl investisiya şirkətlərinin vəsaitlərinin də cəlb edilməsi planlaşdırılır.