Sahibkarlıq

Sahibkarlıq

Lənkəranda yeni mini çay fabrikinin tikintisinə başlanıb

12 noyabr 2009 00:42 (UTC +04:00)

Lənkəran. Ağəddin Babayev – APA. Lənkəran rayonunun Sütəmurdov kəndi ərazisində yeni mini çay fabrikinin tikintisinə başlanıb.

Lənkəran Şəhər İcra Hakimiyyətindən (ŞİH) APA-nın cənub bürosuna verilən məlumata görə, gündəlik istehsal gücü 2,5 ton olan bu emal müəssisəsi regionda çayçılığın inkişafına böyük təkan verəcək.

Sovet dönəmində təkcə Lənkəranda 7 çay fabrikinin fəaliyyət göstərdiyini diqqətə çatdıran Qafqaz və Azərbaycan Çay Assosiasiyalarının prezidenti, kənd təsərrüfatı elmləri doktoru, professor Fərman Quliyevin fikrincə, yeni emal müəssisəsi həcm etibarı ilə kiçik olsa da, onu işlətmək daha asan başa gələcək. Belə ki, ötən əsrin yadigarları olan həmin fabriklərin gündəlik istehsal gücü 85-100 ton olduğundan, bu gün onları işlətmək iqtisadi baxımdan sərfəli deyil. Tikilməkdə olan mini fabrikdə isə Çindən gətirilmiş ən müasir texnoloji avadanlıqlar quraşdırmaqla gün ərzində 250-300 kiloqram yaşıl çay yarpağı emal etmək mümkün olacaq.

Müəssisənin direktoru Mühəndis Cahangirov isə APA-nın yerli bürosuna açıqlamasında 2 min kv. m ərazini əhatə edən fabrikdə ilkin emal, çeşidləyici və qablaşdırıcı sexlərin qurulacağını, hazır məhsulun isə bazara birbaşa buradan çıxarılacağını bildirib. Onun sözlərinə görə, müəssisənin tikintisi ilə yanaşı, yeni çay plantasiyalarının salınması da mühüm bir vəzifə kimi qarşıda dayanıb. Bu məqsədlə yerli torpaq payçılarından alınmış 30 hektarlıq köhnə çay plantasiyasında hazırda bərpa və becərmə tədbirləri həyata keçirilir. İlin sonunadək istismara buraxılması nəzərdə tutulan müəssisədə 50 nəfər yerli sakin daimi işlə təmin olunacaq.