Sahibkarlıq

Sahibkarlıq

Bakıda keçiriləcək «İnsan kapitalı. Dövlət. Biznes» adlı beynəlxalq konfransda müzakirə olunacaq mövzuların adları açıqlanıb

12 noyabr 2009 13:35 (UTC +04:00)

Bakı. Nicat Mustafayev – APA-Economics. Bu il noyabrın 25-26-da Azərbaycan Rabitə və İnformasiya Texnologiyaları Nazirliyinin və «AccessBank»ın dəstəyi, həmçinin «Allianz Group» şirkətinin təşkilatçılığı ilə Bakıda keçiriləcək «İnsan kapitalı. Dövlət. Biznes» adlı I Beynəlxalq Konfransda 70-dən artıq dövlət müəssisəsi, şirkət və təşkilatların nümayəndələri iştirakını təsdiqləyib.

«APA-Economics»in məlumatına görə, bir sıra iqtisadçı, mütəxəssis və ictimai xadimlərin iştirak edəcəyi tədbirdə 10 məruzə, 5 təlim və 4 dəyirmi masa təşkil olunacaq. Çıxış edən məruzəçilər Rusiyanın «Mobilnıye TeleSistemı», «Texnosila», Azərbaycanın «Access Bank», Latviyanın «In Form Network», ABŞ-ın «Profiles International», Qazaxıstanın «Air-Astana», «DeltaCredit - Sosiete General Group» Rusiya-Fransa bankı və digər şirkətləri təmsil edəcək.

Konfransda aşağıdakı mövzularda müzakirələr aparılacaq:

- İnsan kapitalının inkişafında dövlətin yeri və rolu;
- İnsan kapitalının inkişafında biznesin yeri və rolu;
- İnsan kapitalı – hər bir təşkilatın əsasıdır;
- İnsan kapitalı – dövlətin iqtisadiyyatının inkişafının əsasıdır;
- Regionların inkişafı və miqrasiya;
- İnsan kapitalına yatırılan investisiyalar: metod, üsul və vasitələri.

Beynəlxalq tədbir haqqında əlavə məlumat almaq və konfransda qeydiyyatdan keçmək üçün “İnsan kapitalı. Dövlət. Biznes” I Beynəlxalq Konfransının meneceri Səfiyə Nizaməddinovaya müraciət etmək olar:

http://allianzgroup.az/conference
[email protected]
Tel.: (+99 412) 465 00 36/37, Mob.: (+99 455) 276 76 00.

Qeyd edək ki, APA İnformasiya Agentliyi beynəlxalq konfransın təşkilatçıları tərəfindən tədbirin rəsmi informasiya tərəfdaşı seçilib.