Sahibkarlıq

Sahibkarlıq

Azərbaycanın üç müəssisəsi Standartlaşdırma, Metrologiya və Sertifikatlaşdırma üzrə Dövlətlərarası Şuranın keçirdiyi müsabiqədə birinci yeri tutub

16 noyabr 2009 07:35 (UTC +04:00)

Bakı. Rəşad Süleymanov - APA-Economics. Standartlaşdırma, Metrologiya və Sertifikatlaşdırma üzrə Dövlətlərarası Şuranın MDB ölkələri arasında keçirdiyi müsabiqənin nəticələri açıqlanıb.

Bu barədə «APA-Economics»ə Azərbaycan Standartlaşdırma, Metrologiya və Patent üzrə Dövlət Komitəsinin mətbuat xidmətindən məlumat verilib.

Məhsul və xidmətlərin keyfiyyəti üzrə nailiyyətlərə görə keçirilən beynəlxalq müsabiqəyə qatılan Azərbaycanın 4 istehsal müəssisəsindən 3-ü ayrı-ayrı kateqoriyalar üzrə I yerə layiq görülüb.

Dövlətlərarası Şura ekspertlərinin rəyləri gizli səsvermədən sonra ümumiləşdirilib. Nəticələrə əsasən, “İşçilərinin sayı 250-dək olmaqla sənaye məhsulları istehsalı” kateqoriyasında 630 xal toplamaqla “NJT 2000” şirkəti, “İşçilərinin sayı 250-dək olmaqla xalq istehlakı mallarının istehsalı” kateqoriyasında I yerə 912 xal toplamaqla “Gazelli” MMC, “İşçilərinin sayı 250 nəfərdən çox olmaqla xalq istehlakı mallarının istehsalı” kateqoriyasında isə I yerə 635,7 xal toplamaqla “Qafqaz Konserv Zavodu” MMC layiq görülüb. Təltifetmə mərasiminin cari ilin dekabr ayında Rusiyanın Moskva şəhərində keçirilməsi gözlənilir.