Sahibkarlıq

Sahibkarlıq

Bakıda Rakia Gürcüstan Sərbəst Sənaye Zonası ilə bağlı təqdimat keçirilib

18 noyabr 2009 06:59 (UTC +04:00)

Bakı. Nicat Mustafayev – APA-Economics. Gürcüstanın Azərbaycandakı səfirliyi və Azərbaycan İqtisadi İnkişaf Nazirliyinin İxracın və İnvestisiyaların Təşviqi Fondu (Azpromo) təşkilatçılığı ilə Poti şəhərində yerləşən Rakia Gürcüstan Sərbəst Sənaye Zonası ilə bağlı Bakıda təqdimat keçirilib.

Nazirlikdən «APA-Economics»ə verilən məlumata görə, tədbirdə Azərbaycan və Gürcüstanın İqtisadi İnkişaf nazirlikləri, Gürcüstanın Azərbaycandakı səfirliyinin nümayəndələri və 80-dən çox sahibkar iştirak edib. Tədbiri giriş sözü ilə açan Gürcüstanın Azərbaycandakı səfiri Nikolas Nadbiladze iki ölkə arasında iqtisadi əməkdaşlığın mövcud vəziyyəti və inkişaf perspektivləri barədə ətraflı məlumat verib, əlaqələrin bundan sonra da inkişaf etdirilməsi üçün möhkəm zəmin yaradıldığını vurğulayıb.

Azərbaycanın iqtisadi inkişaf naziri Şahin Mustafayev ölkədə əldə edilən iqtisadi uğurlar barədə məlumat verib və qeyd edib ki, həyata keçirilmiş tədbirlər nəticəsində Azərbaycanda əlverişli biznes mühiti formalaşıb, sahibkarlığa dövlət dəstəyi gücləndirilib, bir sıra ölkələrlə, o cümlədən Gürcüstanla ikitərəfli əlaqələrin inkişaf etdirilməsi sahəsində ciddi irəliləyişlərə nail olunub. Hazırda Gürcüstanda azərbaycanlı iş adamları tərəfindən yaradılmış 40-dan çox iri şirkət fəaliyyət göstərir. İki ölkə arasında əlaqələri daha da inkişaf etdirmək, Azərbaycan şirkətlərinin Gürcüstanda fəaliyyətinin genişləndirilməsinə dəstək göstərmək məqsədilə bu ilin sentyabr ayında Azpromo-nun Gürcüstanda nümayəndəliyi yaradılıb. Ş.Mustafayev xüsusi iqtisadi zonalarla bağlı Gürcüstan təcrübəsinin öyrənilməsi məqsədilə bu il Azərbaycan nümayəndə heyətinin Poti şəhərinə səfər etdiyini vurğulayıb, azərbaycanlı iş adamlarını Rakia Gürcüstan Sərbəst Sənaye Zonasında yaradılmış biznes imkanları ilə yaxından tanış olmağa dəvət edib.

Gürcüstanın iqtisadi inkişaf naziri Zurab Pololikaşvili ölkəsinin Azərbaycanla iqtisadi əlaqələrinin inkişafına xüsusi önəm verdiyini qeyd edib, Azərbaycanın Gürcüstanın strateji tərəfdaşı olduğunu bildirib. Azərbaycan Dövlət Neft Şirkətinin «SOCAR Georgia» şirkətinin «İlin İnvestoru» adına layiq görüldüyünü vurğulayan Z.Pololikaşvili Azərbaycan şirkətlərini Rakia Gürcüstan Sərbəst Sənaye Zonasında yaradılmış imkanlardan yararlanmağa dəvət edib.

Daha sonra «Rakia Gürcüstan Sərbəst Sənaye Zonası» MMC-nin direktoru Xater Massaad zonanın təşkilati-idarəetmə strukturu və fəaliyyət prinsipləri ilə bağlı təqdimat keçirib, iş adamlarını maraqlandıran sualları cavablandırıb.