Sahibkarlıq

Sahibkarlıq

“Baku Electronics” şirkətinin yeni ofisi açılacaq

23 noyabr 2009 06:53 (UTC +04:00)

Bakı. Aynur Vəliyeva - APA-Economics. Azərbaycanda aparıcı elektrik avadanlığı və məişət texnikası təchizatçılarından biri olan “Baku Electronics” şirkətinin yeni ofisinin açılışı olacaq.

“Baku Electronics” şirkətinin satış üzrə müdiri Hikmət Hüseynovun “APA-Economics”ə verdiyi məlumata görə, yeni ofisin açılışı gələn ilin mart ayında keçiriləcək.

Bununla yanaşı, şirkət gələn ilin ortasınadək Azərbaycan bazarına paltaryuyan, qabyuyan maşınlar və soyuducular kolleksiyasından yeni seriya məhsullar təqdim edəcək. Yerli məişət avadanlıqları bazarına “Samsung” və “Tefal” şirkətlərinin məhsullarından ibarət yeni kolleksiyalar təqdim ediləcək.

Bu haqda bəhs edən H.Hüseynov Azərbaycan məişət texnikası bazarında “Siemens” şirkətinin istehsalı olan paltaryuyan maşınlara, soyuduculara, qurulan texnikaya, sobalara, elektrik tozsoranları daha çox tələbat müşahidə olunduğunu bildirib. Qiymət seqmentinə gəldikdə, əsasən “Hi” seqmentinə və digər bütün seqmentlərə marağın olduğu qeyd edilib.

Bütün dünya üzrə müşahidə olunan iqtisadi böhran “Bakı Electronics” şirkətinin satış həcmlərinə çox az təsir edib ki, bu da ölkə iqtisadiyyatının inkişafına yönəldilmiş dövlət siyasətinin və şirkətin çevik qiymət siyasətinin nəticəsidir.

H.Hüseynov deyib ki, bu ilin sonuna olan proqnozlara əsasən, şirkətin satış həcmlərinin ötən ilin səviyyəsində və ya bir az aşağı səviyyədə olmasını gözləmək olar. Lakin şirkətin bütün qiymət seqmentlərinə uyğun olan məhsulları bazara təqdim etməsi və kreditlə satış sisteminin əlverişli olmasında bütün dünyada müşahidə olunan istehlakçı tələbatının uçurumu baş verməyib.

Xatırladaq ki, şirkət Azərbaycan məişət avadanlıqları bazarında 1994-cü ildən etibarən fəaliyyət göstərir və yerli bazarda üç brendin rəsmi distribütoru kimi fəaliyyət göstərir. Bunlar “Samsung”, “Siemens” və “Tefal” şirkətləridir.