Sahibkarlıq

Sahibkarlıq

Bakıda Azərbaycan-Belçika biznes-forumu keçirilib

23 noyabr 2009 09:46 (UTC +04:00)

Bakı. Rəşad Süleymanov - APA-Economics. Bu gün Bakıda Belçikanın Flandriya regionunda fəaliyyət göstərən şirkətlərin iştirakı ilə Azərbaycan-Belçika biznes-forumu keçirilib.

«APA-Economics»in xəbərinə görə, biznes-forumda Belçikadan 15, Azərbaycandan isə 40-a yaxın iş adamı iştirak edib.

İqtisadi İnkişaf Nazirliyi aparatının rəhbəri Samir Vəliyev bildirib ki, forumda Belçikanı əsasən kənd təsərrüfatı, sənaye, nəqliyyat, konsaltinq sahələrində fəaliyyət göstərən şirkətlər təmsil edir. Azərbaycanın iqtisadi imkanları və bu sahədə həyata keçirilən dövlət siyasəti barədə məlumat verən S.Vəliyev bildirib ki, qeyri-neft sektorunun inkişaf etdirilməsi hökumətin prioritetləri sırasında əsas yeri tutur. Müstəqillik əldə etdiyi 1991-ci ildən bu günədək ölkə iqtisadiyyatına 70 mlrd. dollardan artıq investisiya yatırıldığını qeyd edən S.Vəliyev bunun yarıdan çoxunu xarici investisiyalar təşkil etdiyini vurğulayıb.

Azərbaycan və Belçika arasında ikitərəfli əlaqələrin inkişaf etdiyini qeyd edən nazirlik rəsmisi onu da vurğulayıb ki, dünyadakı iqtisadi böhrana baxmayaraq, ölkələr arasında ticarət dövriyyəsi cari ilin yanvar-sentyabr aylarında 2008-ci ilin müvafiq dövrü ilə müqayisədə 46% artaraq 66 mln. dollar təşkil edib.

Azərbaycanın Belçikadakı səfiri Emin Eyyubov isə xarici iş adamlarının nəzərinə çatdırıb ki, Azərbaycanda turizm, sənaye və kənd təsərrüfatı prioritet sahələrdəndir. Bu sektorlara investisiya yatırılması daha məqsədəuyğundur.

Belçikanın Azərbaycandakı səfiri Filipp Jottard isə biznes-forumda iştirak edən heyətin Azərbaycana gəlmiş ilk Belçika ticarət missiyası olduğunu qeyd edib. Səfir bildirib ki, ölkəsi Azərbaycanın Ümumdünya Ticarət Təşkilatına üzvlüyünə dəstək verir.

Daha sonra belçikalı iş adamlarına Azərbaycanda İxracın və İnvestisiyaların Təşviqi Fondu (AZPROMO) və «Azərbaycan İnvestisiya Şirkəti» ASC-nin fəaliyyəti, həyata keçirdikləri layihələr barədə məlumatlar verilib.