Sahibkarlıq

Ana səhifə

Sahibkarlıq

Bu il Azərbaycanın ixrac əməliyyatlarının həcmi 74,86%, idxal əməliyyatlarının həcmi isə 16% azalıb

23 noyabr 2009 11:23 (UTC +04:00)

Bakı. Rəşad Süleymanov - APA-Economics. Cari ilin yanvar-oktyabr aylarında Azərbaycanın xarici ticarət dövriyyəsində 6 604 358,9 min ABŞ dolları dəyərində müsbət saldo yaranıb. Bu barədə «APA-Economics»ə Dövlət Gömrük Komitəsindən məlumat verilib.

Ötən ilin müvafiq dövrü ilə müqayisədə Azərbaycanın xarici ticarət dövriyyəsində müsbət saldonun həcmi 6% azalıb. Hesabat dövründə Azərbaycanın ixrac əməliyyatlarının həcmi 11 560 983,9 min dollar, idxal əməliyyatlarının həcmi isə 4 956 625 min dollar təşkil edib. O cümlədən ölkəyə 25 375,4 min dollar dəyərində 1 570,2 ton əmtəə təmənnasız kömək, humanitar və texniki yardım kimi daxil olub.

Ötən ilin müvafiq dövrü ilə müqayisədə ixrac əməliyyatlarının həcmi 74,86%, idxal əməliyyatlarının həcmi isə 16% azalıb.

Gömrük Komitəsinin məlumatında o da qeyd olunub ki, müvəqqəti ixrac rejimində Azərbaycandan 123 432 min dollar dəyərində mal ixrac olunub, 382 339,1 min dollar dəyərində mal isə müvəqqəti idxal edilib.

İxracın 80,46%-ni xam neft, 10,95%-ni neft məhsulları, idxalın isə 35,22%-ni maşın, elektrik avadanlıqları, elektrotexniki avadanlıqlar və onların ehtiyat hissələri, 13,07%-ni nəqliyyat vasitələri, 11,44%-ni ərzaq məhsulları təşkil edib.

İxracın strukturunda xam neftin xüsusi çəkisi 2008-ci ilin müvafiq dövrü ilə müqayisədə 16 faiz bəndi azalıb, neft məhsullarının xüsusi çəkisi isə 2,9 dəfə artıb.

Qeyd edək ki, cari ilin hesabat dövründə Azərbaycanda xarici ticarətlə 8 345 hüquqi və fiziki şəxs məşğul olub. İxrac əməliyyatlarında dövlət sektorunun payı 93,33%, özəl sektorun payı 5,82%, fiziki şəxslərin payı 0,85% təşkil edib. İdxal əməliyyatlarında isə bu göstərici müvafiq olaraq 32,13%, 63,03% və 4,84% təşkil edib.