Sahibkarlıq

Ana səhifə

Sahibkarlıq

Azərbaycanın torpaq bazarında qiymət azalması davam edir

08 dekabr 2009 10:02 (UTC +04:00)

Bakı. Nicat Mustafayev - APA-Economics. Bu ilin oktyabr ayı ərzində Azərbaycanda torpaq bazarında ən ucuz torpaq sahəsi Əzizbəyov (Türkan qəsəbəsi), ən bahalı torpaq sahəsi isə Nərimanov rayonunda (Atatürk prospekti) qeydə alınıb.

«Əmlak Bazarı İştirakçılar» İctimai Birliyindən “APA-Economics”ə verilən məlumata görə, oktyabrda torpaq bazarında təklif olunan torpaq sahələrinin əsasını ötən aylarda olduğu kimi, boş torpaqlar təşkil edib. Sentyabr ayında da köhnə yaşayış evlərinin sökülməsi zəif olub, boş torpaqlarda tikilən fərdi yaşayış evlərinin sərhədi şəhərin kənarına və şəhərətrafı ərazilərə (III və IV zonalar üzrə) doğru genişlənməkdə davam etsə də, tikintinin tempinin azalması tendensiyası bir qədər də dərinləşib. Aparılan söküntü işləri zamanı dövlət tərəfindən sosial obyektlərin tikintisinə, yolların salınmasına və genişləndirilməsinə daha çox rast gəlinib.

Oktyabr ayında bazara təklif olunan ümumi 819,3 ha torpaq sahəsinin 76,6%-ni boş sahə, qalanını isə qeyri-yaşayış sahələri və köhnə yaşayış sahələri təşkil edib. Torpaq bazarında qiymət indeksi 8,7 bənd azalaraq 281,8 səviyyəsində qərarlaşıb. Torpaq bazarının şəhərətrafı və paytaxtdan kənar ərazilərə doğru genişlənməsi tendensiyası oktyabr ayında bir qədər zəifləyib. Ay ərzində torpaq üzərində bağlanan alqı-satqı əqdlərinin sayında müvafiq olaraq azalma müşahidə olunub və bazarın aktivliyi əvvəlki aya nisbətən mənfiyə doğru dəyişib.

Ötən aylarda olduğu kimi, oktyabr ayında da Bakı şəhəri üzrə torpaq bazarında orta qiymətlərdə azalma müşahidə olunub. Ay ərzində bazara çıxarılan 1 sot torpağın orta qiyməti 3% azalaraq 16 842 $/sot səviyyəsindən 16 341 $/sot səviyyəsinə enib. Ən çox qiymət azalması isə (-7,4%) Xətai rayonunda qeydə alınıb.

İB-nin monitorinq qrupunun araşdırmaları zamanı müəyyən olunub ki, ay ərzində qiymət azalması bütün zonalarda qeydə alınıb. Bu, bütün zonalar üzrə torpağın bazar qiymətinin real dəyərindən çox baha olması ilə bağlıdır.

Şəhərin mərkəzində qiymətlərin həddən artıq yüksək olması I və II zonalarda tələbin aşağı düşməsi ilə paralel olaraq qiymətlərin də azalmasına səbəb olub. Lakin III və IV zonalarda təklifin çox olması, tikintinin tempinin aşağı enməsi nəticəsində torpağa olan tələbin sürətlə azalması bu zonalar üzrə qiymətlərin enmə tendensiyasını saxlayır.

Torpaq sahələrinin ipoteka prosesində girov predmeti kimi qəbul olunmaması da daşınmaz əmlak subyekti kimi mülkiyyətin bu növünə olan marağı xeyli zəiflədib. Son aylar bazarda baş verən proseslər bazarın bu seqmenti ilə aparılan əməliyyatlarda risk dərəcəsini artırıb. Bütün bunlarla yanaşı, hazırda torpaq bazarında nisbətən aktiv rayonlar sırasına Binəqədi və Nərimanov rayonları başçılıq edirlər. Ən passiv rayon isə ötən aylar olduğu kimi Nəsimi rayonudur.

Ay ərzində bazara təklif olunan ən bahalı torpaq sahəsi Nərimanov (Atatürk prospekti) rayonunda (250 min $/sot), ən ucuz torpaq sahəsi isə Əzizbəyov (Türkan qəsəbəsi) rayonunda (625 $/sot) qeydə alınıb.