Sahibkarlıq

Sahibkarlıq

Oktyabrda Azərbaycanın təkrar avtomobil bazarında nisbi aktivlik qeydə alınıb

08 dekabr 2009 10:09 (UTC +04:00)

Bakı. Nicat Mustafayev – APA-Economics. Bu ilin oktyabr ayında Azərbaycanda təkrar avtomobil bazarında mövsümlə əlaqədar nisbi aktivlik qeydə alınıb.

«Əmlak Bazarı İştirakçıları» İctimai Birliyindən «APA-Economics»ə verilən məlumata görə, ayın əvvəlində avtomobillərin qiymətinə təsir göstərməyən dinamiklik müşahidə olunub ki, bu, özünü bağlanan əqdlərin dinamikasında da göstərib.

Oktyabrda sentyabr ayı ilə müqayisədə təklif stabil, tələb isə dəyişməz qalıb. Ay ərzində satış mərkəzlərinə müraciət edənlərin sayında ötən ayla müqayisədə cüzi artım qeydə alınıb. Bu, bağlanan əqdlərin dinamikasının artmasına az da olsa (1,4%), təsir göstərib. Ay ərzində bazarda orta qiymət əvvəlki ayla müqayisədə dəyişməyib və ötən ay olduğu kimi, orta qiymət 16 100 ABŞ dollarına bərabər olub.

Bazarda müşahidə olunan nisbi aktivlik avtomobillərin ekspozisiya müddətinin artmasının qarşısını alıb. Ekspozisiya müddətinin aşağı düşməsinə baxmayaraq, əmlakın bu növü üzrə risk dərəcəsi hələ də yüksək olaraq qalıb ki, bu da öz növbəsində avtomobillərin likvidlik əmsalına mənfi təsir göstərib.

Oktyabr ayında təkrar avtomobil bazarında araşdırma predmeti olan 7 100-dən artıq avtomobilin 40,2%-i bazara məhz oktyabr ayı ərzində təklif olunub. Qalan 59,8%-i isə əvvəlki aylardan qalan avtomobillərdir.

Avronun dolları üstələmə tendensiyası idxal olunan avtomobillərin qiymətlərində özünü göstərsə də, bazarda tələbin aşağı olması avtomobillərin satış qiymətlərinin artmasının qarşısını alıb. Avtomobillərin satış qiymətləri çox artmasa da, sahibkarlar xarici valyutaların devalvasiyasının bazara mənfi təsir göstərdiyini və avtomobillərin gəlirlilik dərəcəsinin azaldığını gizlətmirlər.

İki ildən artıqdır təkrar bazarda liderliyi böyük fərqlə əldə saxlayan məşhur alman markası «Mercedes-Benz»in təklif üzrə payı ümumi portfeldə yenidən 38,6%-ə qalxıb (artım 4,6%). Buna baxmayaraq, «Mercedes-Benz» ümumi təklif portfelində digər rəqiblərini hələ də böyük fərqlə geridə qoyur.

Ümumilikdə 9 markanın təklif üzrə payı 82,5% təşkil edib. Yerdə qalan 17,5% isə 20-dən artıq şirkətin istehsalı olan 85-ə yaxın avtomarka arasında bölünür. Təkrar bazara təqdim olunan avtomobillərin illər üzrə bölgüsündə ciddi dəyişiklik baş verməyib. Belə ki, tədricən ili köhnə olan avtomobillərə maraq azalır və 1998-2001-ci illərin istehsalı olan avtomobillərin bazarda 1996-1997-ci illərin markalarını üstələmə tendensiyası davam edir.