Sahibkarlıq

Ana səhifə

Sahibkarlıq

Müəllif hüquqlarının pozuntusu kibercinayətkarlığa bərabər sayılır

08 dekabr 2009 10:28 (UTC +04:00)

Bakı. Aynur Vəliyeva - APA-Economics. Azərbaycanda NISA-nın kibertəhlükəsizlik üzrə qış sessiyası davam edir.

Rabitə və İnformasiya Texnologiyaları Nazirliyinin hüquq və kadrlar şöbəsinin müdiri Bəxtiyar Məmmədovun “APA-Economics”ə verdiyi məlumata görə, seminar müəllif hüquqları və kibercinayətkarlıq sahəsində beynəlxalq təcrübənin öyrənilməsinə, bu sahədə məlumat mübadiləsinə, mövcud problemlərə həsr olunub.

B.Məmmədovun sözlərinə görə, 2005-ci ildə ABŞ-da müəllif hüquqlarının pozuntusu kibercinayətkarlığa bərabər sayılıb və hazırda da bu belədir.

Seminarda qeyd edilib ki, müəssisənin ticarət markasının adını daşıyan domen adları ilə hər hansı bir özəl şirkət tərəfindən alver edilməsi yolverilməzdir, çünki ticarət markası müəssisənin əqli mülkiyyətidir.

B.Məmmədov öz çıxışında ölkədə İKT sahəsinin inkişafına dair məruzə edib, Azərbaycanın kibercinayətkarlıq üzrə beynəlxalq konvensiyaya qoşulduğunu və bu konvensiyanın qaydalarına riayət etdiyini bildirib.

Tədbirdə kiberdünya, təşkilatlar tərəfindən və fərdi sürətdə törədilən kibertəhlükələr, NATO-nun kibersiyasəti və informasiya təhlükəsizliyinə dair məsələlər müzakirə olunur, Eyni zamanda simulyasiya proqramına keçid məsələsinə də baxılacağı planlaşdırılır.

Qeyd edək ki, tədbir Azərbaycan Xarici İşlər Nazirliyi və NATO-nun İctimai Diplomatiya İdarəsinin dəstəyi ilə keçirilir və dekabrın 13-dək davam edəcək. Seminarda Türkiyə, Gürcüstan və Estoniya nümayəndələri, həmçinin əqli mülkiyyət və informasiya təhlükəsizliyi sahəsində beynəlxalq ekspertlər iştirak edirlər.