Sahibkarlıq

Sahibkarlıq

Son bir ildə Azərbaycanda tikinti materiallarının qiymətləri 6% bahalaşıb

08 dekabr 2009 10:50 (UTC +04:00)

Bakı. Nicat Mustafayev - APA-Economics. Bu ilin oktyabr ayında Azərbaycanın tikinti materialları bazarında qiymətlər sentyabra ayı ilə müqayisədə 1,6% ucuzlaşıb.

«Əmlak Bazarı İştirakçıları» İctimai Birliyindən «APA-Economics»ə verilən məlumata görə, oktyabrda Bakı şəhəri üzrə tikinti materialları bazarında 38 adda, 91 çeşiddə tikinti materiallarının qiyməti izlənilib. Araşdırılan məhsullar üzrə ölkədə istehsal olunan malların ümumi istehsalda həcmi 52,7% təşkil edib.

Ümumilikdə oktyabrda araşdırmaya məruz qalan 91 adda məhsuldan 23-ü üzrə qiymət azalması, 7-si üzrə qiymət artımı, 61-i üzrə isə stabillik müşahidə edilib. Qiyməti azalan məhsullar ümumi təklif portfelində əsas çəkiyə sahib olan məhsullar olduğundan, bazardakı orta qiymətlərdə də azalma qeydə alınıb. Nəticədə ay ərzində bazarda formalaşan orta qiymətlərdə azalma sentyabr ayı ilə müqayisədə 1,6% təşkil edib. Ümumilikdə isə tikinti materiallarının qiyməti ilin əvvəli ilə müqayisədə 26,3%, ötən illə müqayisədə isə 6,07% bahalaşıb. Qiymət indeksi ötən aya nisbətən 2,2 bənd azalaraq 131,8 səviyyəsində qərarlaşıb.

Oktyabrda mişar daşı 3,7%, taxta 7,5%, şifer 4,3%, mismar 8,1%, laminat-parket 2,9%, şüşə pambıq 16,6% bahalaşıb. Qum 4%, çınqıl 9,7%, otsep 10%, armatur 0,6%, künyə 2,8%, şveller 4,5%, dəmir təbəqə 1,3%, katinka 3,1%, dam örtüyü 0,5%, plastik boru 5,7%, lambirin 7,4%, alçipan 2,5%, izolyasiya 3,3%, alkopan isə 3% ucuzlaşıb.

Digər tikinti materiallarının qiyməti oktyabr ayında stabil qalıb. Bundan başqa, oktyabr ayında istehsal mallarının ümumi qiymət portfelindəki payı idxalı 3 dəfəyə yaxın üstələyib.

Qeyd edək ki, oktyabrda qiymət azalmasına baxmayaraq, tələbdə stabillik müşahidə olunub.