Sahibkarlıq

Ana səhifə

Sahibkarlıq

Bakıda 3 otaqlı mənzillərə tələbat artır

08 dekabr 2009 12:04 (UTC +04:00)

Bakı. Rəşad Süleymanov - APA-Economics. Cari ilin oktyabr ayında Bakı şəhəri üzrə təkrar bazarda bağlanan əqdlərin dinamikasında sentyabr ayı ilə müqayisədə 0,7% artım qeydə alınıb. Bu barədə «APA-Economics»ə «Əmlak Bazarı İştirakçıları» İctimai Birliyindən məlumat verilib.

Araşdırmalara görə, təklif üzrə azalma ümumi təklif portfelində yeni tikililərinin payının (59%) cüzi azalmasına təsir göstərib. Təkrar bazardakı yeni tikililərin sayı ötən ayla müqayisədə (-1,4%) azalıb. Bazarda təklifin (2%) azalmasına baxmayaraq, orta qiymət də 2,9% ucuzlaşıb. İpoteka kreditləşməsinin təsiri nəticəsində əmlakın bu növü üzrə likvid dəyər nisbi artsa da, risk dərəcəsi hələ də yüksək olaraq qalıb. Əqdlərin sayının azalması təkrar mənzillər üzrə yenidən ekspozisiya müddətinin artımı ilə müşahidə olunub. Sentyabrla müqayisədə oktyabrda ekspozisiya müddəti daha 3 gün artaraq 105 günə çatıb. Təklifin azalması və bazarın bu seqmentində əmlakın likvid dəyərinin artması əmlakın bu növü üzrə gəlirlik əmsalına müsbət təsir göstərib və təkrar mənzil bazarı üzrə gəlirlik 2,3% artıb.

Aparılan araşdırmalardan məlum olub ki, təkrar bazarda şəhər üzrə mənzillərin qiymət indeksi qiymətə müvafiq olaraq 2,9% azalıb.

Yeni tikililərin sayının təkrar bazarda ümumi təklif portfelində artması nəticəsində otaq sayına görə təklif portfelində 3 otaqlı mənzillərin mövqeyi güclənib. İki otaqlı mənzillər üzrə tələb və təklifin digər mənzilləri üstələmə tendensiyası sentyabrda yenidən 3 otaqlı mənzillərlə əvəz olunub və bu tendensiya oktyabr ayında da davam edib. Oktyabr ayında aparılan araşdırmalar təkrar bazarda 3 otaqlı mənzillərin ümumi portfeldəki payının (39,3%) 2 otaqlıları (36,9%) üstələdiyini üzə çıxarıb. Oktyabrda təkrar bazarda ümumi təklif portfelinə Yasamal rayonu (28,5%) başçılıq edib.

Oktyabr ayında aktivlik əmsalına görə ən cəlbedici rayonlar Xətai, Nərimanov və Yasamal rayonları olub. Bu rayonların ən vacib cəhəti ipoteka üçün daha səmərəli olmaları göstərilir.

Hesabat dövründə təkrar mənzil bazarında qiymət indeksi 7 bənd azalaraq 232,4 bənd səviyyəsində qərarlaşıb.

Aparılan araşdırmalara əsasən, oktyabrda təklif 2% azalıb və nəticədə bazara satış üçün təklif olunan mənzillərin sayı 7000-ə enib. Yasamal, Xətai, Nərimanov və Nəsimi rayonlarının təklif portfelindəki payı mütləq çoxluq təşkil edib. Bu 4 rayonun ümumi təklif portfelindəki payı birlikdə 78,6%-ə bərabərdir.

Oktyabr ayında otaqlar üzrə 1 və 5 otaqlı mənzillərin sayında azalma qeydə alınıb. Təklif üzrə ən çox azalma 1 otaqlılarda qeydə alınıb (1,9%). İki, üç və dörd otaqlı mənzillərin təklif üzrə payında isə artım müşahidə olunub. Ən çox artım 3 otaqlı mənzillərdə qeydə alınıb (3,4%).

Oktyabr ayında qiymət indeksində 7 bənd azalma müşahidə edilib. Orta qiymət 2,9% azalaraq ötən ay qeydə alınmış 1280 $/kv.m-dən 1243 $/kv.m-ə enib.

Ay ərzində yeganə orta qiymət artımı Qaradağ rayonunda (0,4%) qeydə alınıb, digər rayonların hamısında qiymət azalması baş verib. Oktyabrda ən çox qiymət azalması Binəqədi rayonunda (2,2%) qeydə alınıb.

Bazarda mənzillərin 1 kv. m-nin orta qiymətindən (1243 ABŞ dolları) aşağı olan mənzillər ümumi portfeldə daha çox paya, yəni 56,2%-ə malikdir. Mənzillərin orta otaq göstəricisi 2,49 (artım 2%), hər otağın orta satış qiyməti 48 230 ABŞ dolları (artım 1,8%), mənzilin orta qiyməti isə 112 319 (azalma 2,8%) ABŞ dolları təşkil edib.