Sahibkarlıq

Ana səhifə

Sahibkarlıq

Lord Freyzer: «Azərbaycan dağları Avstriya və İsveçrədəki dağ silsilələrini kölgədə qoyur»

09 dekabr 2009 14:18 (UTC +04:00)

London. Vüqar Mustafayev - APA-Economics. Azərbaycanın coğrafi yerləşməsi və mövcud iqlim şəraiti ölkədə turizm və aqrar sektor kimi sahələrin sürətlə inkişaf etdirilməsi üçün əlverişli şərait yaradır. «APA-Economics»in məlumatına görə, bunu dekabrın 8-9-da Londonda keçirilən I Azərbaycan İnvestisiya Sammitinin ikinci günündə Böyük Britaniya-Azərbaycan Cəmiyyətinin sədri Lord Freyzer bəyan edib.

Dəfələrlə Azərbaycanda səfərdə olduğunu bildirən Lord Freyzer yerli əhalinin biznes və fermer təsərrüfatının inkişaf etdirilməsinə ciddi maraq göstərdiyini, ölkənin savadlı kadrlara malik olduğunu, münbit torpaq ehtiyatlarının yüksək məhsuldarlığının olduğunu vurğulayıb. «Azərbaycan ərazisində yerləşən Qafqaz dağlarının görünüşü isə hətta Avstriya və İsveçrədəki dağ komplekslərini kölgədə qoyur. Burada gözəl və gəlirli turizm-istirahət kompleksləri inşa etmək mümkündür», - deyə Böyük Britaniya-Azərbaycan Cəmiyyətinin sədri qeyd edib.

Sammitdə Azərbaycanın aqrar sektorunun mövcud vəziyyəti, aparılan islahatların nəticələri və əməkdaşlıq perspektivləri haqqında danışan kənd təsərrüfatı nazirinin müavini İlham Quliyev isə bildirib ki, hazırda ölkədəki işçi qüvvəsinin 39%-i məhz aqrar bölmədə cəmlənib, istehsal həcminin 99,8%-i isə qeyri-dövlət bölməsinin payına düşür. Bununla yanaşı, vurğulanıb ki, son illər ərzində aqrar bölmənin müxtəlif seqmentlərində əhəmiyyətli istehsal artımı müşahidə olunur və bunun nəticəsində, illik taxıl istehsalını 3 mln. tona, o cümlədən buğda istehsalını 2,2 mln. tona çatdıran Azərbaycan 2009-cu ildə ilk dəfə bu məhsul üzrə daxili imkanlar hesabına ölkənin təmin edilməsinə nail olub.

Konfransda çıxış edən Azərbaycan nəqliyyat nazirinin müavini Musa Pənahov isə son illər ərzində ölkənin nəqliyyat kompleksində həyata keçirilən yerli və beynəlxalq investisiya layihələrinin icrası, yeni layihələrin hazırlıq işləri və əməkdaşlıq perspektivləri haqqında danışıb. M.Pənahovun sözlərinə görə, yaxın beş ildə Bakıda 75-dək yeni yeraltı və yerüstü yol keçidlərinin inşası, dəmir yollarının yenidən qurulması, yeni avtomagistralların inşası və s. infrastruktur obyektlərinin tikintisi planlaşdırılır.

Sammitdə çıxış edən rabitə və informasiya texnologiyaları nazirinin müavini Elmir Vəlizadə İKT sektorunun ÜDM-in formalaşmasındakı rolu, xidmətlərin çeşidi və həcm artımı haqqında ətraflı məlumat verib. Bununla yanaşı, nazir müavini Azərbaycanın təşəbbüsü ilə irəli sürülən TransAvrasiya Superinformasiya Magistralının inşası layihəsinin hazırlanması, beynəlxalq ictimaiyyət tərəfindən müzakirəsinin aparılması və sonrakı icra mərhələləri haqqında toplantı iştirakçılarını məlumatlandırıb. O, E.Vəlizadə Azərbaycanın ilk milli süni rabitə peykinin kosmosa buraxılması layihəsi ilə bağlı qısa məlumat verib və ölkədə xarici investorlarla İKT sahəsində əməkdaşlıq üçün bir çox digər layihələrin olduğunu vurğulayıb.

Azərbaycan Mədəniyyət və Turizm Nazirliyi Aparatının rəhbəri Firudin Qurbanov öz növbəsində sammit iştirakçılarına ölkəmizin mədəni irsi və turizmin inkişaf etdirilməsi potensialı haqqında məlumat verib. Belə ki, Azərbaycana gələn turistlərin sayı 2003-cü ildəki 1,014 mln. nəfərdən 2008-ci ildə 1,898 mn. nəfərə qədər və ya 87% artıb: «Azərbaycana əsasən Avropa bölgəsindən turistlər gəlir və bu dövlətlər sırasında ilk yerləri Rusiya, Gürcüstan, İran, Türkiyə, Böyük Britaniya, Ukrayna, Qazaxıstan, ABŞ, Almaniya və Çin tutur».

F.Qurbanovun sözlərinə görə, son beş ildə Azərbaycanda otellərin inşası prosesi də xeyli aktivləşib və nəticədə ölkədə bu tipli obyektlərin sayı 2003-cü ildəki 238 vahiddən 2007-ci ildə 320-yə, 2008-ci ildə isə 370-ə çatıb: «Bu isə son bir ildə 15,6%-lik artım deməkdir».

Sammitin ikinci gününün ilk sessiyasının sonunda Naxçıvan Muxtar Respublikasının iqtisadi inkişaf naziri Famil Seyidov, həmçinin «Baker&McKenzie» və «Salans» şirkətlərinin ekspertləri çıxış ediblər.

Qeyd edək ki, Adam Smit İnstitutunun təşkilatçılığı ilə iki gün davam edəcək tədbir çərçivəsində plenar iclaslar, tematik sessiyalar, investorlarla görüşlər və müzakirələr keçiriləcək. Sammitin proqramına Azərbaycanın dövlət qurumları, iri şirkət və təşkilatların nümayəndələrinin 50-dən artıq çıxışı və təqdimatları daxil edilib.

Xatırladaq ki, I Beynəlxalq Azərbaycan İnvestisiya Sammitinin rəsmi veb-saytının Azərbaycan versiyası da istifadəyə verilib. Saytda «tədbirlərin təqvimi», «tərəfdaş proqramları», «nümayəndəliklərin rəyi» və digər rubrikalar yer alıb. Sayt vasitəsilə həmçinin tədbirdə iştirak etmək üçün qeydiyyatdan da keçmək mümkündür. Bundan başqa, veb-saytda sammitdə müzakirə olunacaq əsas mövzular, tədbirin təşkilatçıları və s. haqqında ətraflı məlumatlar yerləşdirilib.

I Beynəlxalq Azərbaycan İnvestisiya Sammitinin rəsmi veb-saytının Azərbaycan versiyası http://www.adamsmithconferences.com/az/yjc001 ünvanında yerləşir.

Sammitin əsas mövzuları və tədbirləri:

* «Azərbaycanda biznes və siyasət» - Azərbaycan hökuməti və iri korporasiyaların nümayəndələrinin məruzələri. Bu sessiyaya Azərbaycanın siyasi, iqtisadi nümayəndələri, həmçinin iş adamlarının çıxışları daxil olacaq. Sessiyada Azərbaycandakı hazırkı siyasi və iqtisadi vəziyyət, son dəyişikliklər müzakirə olunacaq. Bundan başqa, sessiyada Azərbaycanın qanunvericilik orqanları və şirkətlərin rəhbərləri müasir iqtisadi vəziyyətə nə qədər effektli uyğunlaşa bilmələrini təhlil edəcəklər;

* Korporativ road-şou günü: Sammitdə Azərbaycanın iri şirkətlərinin korporativ təqdimatları keçiriləcək. Şirkətlərin nümayəndələri üçün tədbirdə iştirak edəcək analitik, investisiya bankları, vençur və hedc fondları, reytinq agentlikləri və maliyyə məsləhətçiləri qarşısında öz şirkətləri haqqında təqdimatla çıxış etmək imkanı yaradılacaq;

* Diskussiya paneli - «İnvestorları Azərbaycana nə cəlb edir?»: Diskussiyada maliyyə və korporativ investorlar, fondlar, maliyyə analitikləri və məsləhətçiləri, həmçinin Azərbaycan şirkətlərinin rəhbərləri iştirak edəcəklər. Burada əsas müzakirə predmeti Azərbaycanda investisiya mühitinin yaxşılaşdırılması üçün görülən tədbirlər olacaq. Bundan başqa, diskussiyada Azərbaycanda hansı sektorun daha çox investisiya potensialına malik olduğu təhlil ediləcək;

* Praktiki misallar sessiyası - «Güclü biznesin yaradılması üçün Azərbaycandakı investisiya imkanlarından istifadə: regionda uğur qazanmış şirkətlərin tarixi və beynəlxalq layihələrin icrası misalları».
Bu sessiyada Azərbaycanda fəaliyyət göstərən və uğur qazanmış xarici şirkətlərin ətraflı təqdimatı və təcrübəsi nümayiş olunacaq. Sessiyada həmçinin hazırkı iqtisadi vəziyyətdə bazara daxilolmanın ən perspektivli modeli barədə müzakirələr aparılacaq və eyni zamanda, regiona qeyri-maliyyə investisiyalarının yatırılmasının vacibliyi məsələsi təhlil olunacaq;

* Azərbaycan iqtisadiyyatında tez inkişaf edən sektorlarında biznes və investisiya imkanlarının icmalına dair ətraflı Sessiya: bu sessiyada kənd təsərrüfatı, qida sənayesi, telekommunikasiya və informasiya texnologiyaları, turizm, tikinti, daşınmaz əmlak, elektrik enerjisi və nəqliyyat infrastrukturu kimi sahələrinin potensialına baxılacaq;

* Maliyyə sektoru və neft-qaz sahəsi üzrə paralel sessiyalar.

Sessiyalar sammitin ikinci günündə keçiriləcək. Burada iştirakçılara neft-qaz və maliyyə sektorlarının perspektivlərini daha ətraflı təhlil etmək və gələcək planları müzakirə etmək imkanı yaradılacaq.

Sammitin daimi veb-saytları:

http://www.adamsmithconferences.com/YJ1APAe
http://www.adamsmithconferences.com/YJ1APA
http://www.adamsmithconferences.com/az/yjc001