Sahibkarlıq

Sahibkarlıq

Azərbaycan İqtisadi İnkişaf Nazirliyində Rusiyanın Həştərxan vilayətinin nümayəndə heyəti ilə görüş keçirilib

16 dekabr 2009 15:45 (UTC +04:00)

Bakı. Nicat Mustafayev – APA-Economics. Bu gün Azərbaycan İqtisadi İnkişaf Nazirliyində Bakıda səfərdə olan Rusiyanın Həştərxan vilayətinin vitse-qubernatoru, Həştərxan vilayəti hökumətinin sədri Konstantin Markelovun başçılıq etdiyi nümayəndə heyəti ilə görüş keçirilib.

Nazirlikdən «APA-Economics»ə verilən məlumata görə, görüşdə iqtisadi inkişaf nazirinin müavini Niyazi Səfərov Azərbaycan iqtisadiyyatı, aparılan islahatlar və qazanılmış uğurlar barədə məlumat verib. O qeyd edib ki, dünyadakı qlobal maliyyə böhranına baxmayaraq, bu ilin 10 ayı ərzində Azərbaycanda ÜDM 8,3%, neft-qaz sənayesi 13,6%, kənd təsərrüfatı 3,6%, əhaliyə göstərilən pullu xidmətlər 12,6%, əhalinin adambaşına düşən gəlirləri 6,4% artıb, ölkənin valyuta ehtiyatları isə 19,1 mlrd. ABŞ dolları təşkil edib. Nazir müavini deyib ki, 2008-ci ildə Azərbaycan ilə Rusiya arasında ticarət dövriyyəsi əvvəlki illə müqayisədə 26% artaraq 1,9 mlrd. dollarını ötüb. Azərbaycanda Rusiya kapitallı olan 334 şirkət qeydiyyatdan keçib, iki ölkə arasında iqtisadi sahədə 100-ə yaxın sənəd imzalanıb.

Öz növbəsində K.Markelov Həştərxanda 20-dən çox azərbaycanlı iş adamının fəaliyyət göstərdiyini bildirib. Həştərxanda kənd təsərrüfatı, turizm, gəmiqayırma, nəqliyyat, balıqçılıq, səhiyyə və digər sahələrin inkişaf etdiyini bildirən K.Markelov azərbaycanlı sahibkarları bu sahələrdə fəal əməkdaşlığa dəvət edib.

Həştərxan vilayəti nümayəndə heyətinin başçısı həmçinin, Həştərxanda 18 minə yaxın azərbaycanlının yaşadığını qeyd edib, Həştərxanda Azərbaycanın diplomatik nümayəndəliyinin açılmasının əlaqələrimizin daha da genişlənməsində əhəmiyyətli olacağını vurğulayıb.

Qeyd edək ki, görüşdən sonra Azərbaycanın və Həştərxan vilayətinin investisiya imkanlarının təqdimatı keçirilib.