Sahibkarlıq

Ana səhifə

Sahibkarlıq

Azərbaycanda pullu xidmətlərin həcmi yanvar-noyabr aylarında 12% artıb

17 dekabr 2009 08:52 (UTC +04:00)

Bakı. Nicat Mustafayev – APA-Economics. Bu ilin yanvar-noyabr aylarında Azərbaycanda əhaliyə 3 595,9 mln. manatlıq və ya ötən ilin eyni dövründəkindən 12,3% çox pullu xidmətlər göstərilib. Artımın 81,1%-i hüquqi şəxs statuslu müəssisələrin fəaliyyəti üzrə əldə edilib.

Dövlət Statistika Komitəsindən «APA-Economics»ə verilən məlumata görə, hesabat dövründə hər bir ölkə sakini orta hesabla ayda 36,9 manatlıq və ya 2008-ci ilin eyni dövrü ilə müqayisədə 5,8 manat çox müxtəlif növ pullu xidmətlərdən istifadə edib. Artımın 4,7 manatı hüquqi şəxs statuslu müəssisələr üzrə olub.

Hesabat dövründə əhaliyə göstərilən pullu xidmətlərin dəyər həcminin 600,5 mln. manat (və ya 120%) artımının 61,4%-i xidmət növləri üzrə fiziki çəkilərin artması, 38,6%-i isə xidmətlər üzrə qiymətlərin (tariflərin) yüksəlməsi sayəsində yaranıb.

Cari ilin on bir ayında özəl sektorun müəssisələri tərəfindən əhaliyə göstərilən pullu xidmətlərin həcmi isə əvvəlki ilin eyni dövrünün səviyyəsini 9,7% üstələyərək 2 591,3 mln. manata çatıb.

Hesabat dövründə əhaliyə göstərilən pullu xidmətlərin 13,8%-ni məişət xidmətləri təşkil edib. Məişət xidmətlərinin 86,5%-i hüquqi şəxs yaratmadan sahibkarlıq fəaliyyəti göstərən fiziki şəxslərin obyektlərində reallaşdırılıb. Pullu xidmətlərin başqa növləri ilə müqayisədə fərdi sahibkarlıq fəaliyyəti məişət xidmətləri sahəsində daha fəal inkişaf edib, bu fəaliyyət üzrə əhaliyə göstərilən pullu xidmətlərin ümumi həcminin 59,7%-ni məişət xidmətləri təşkil edib.