Sahibkarlıq

Ana səhifə

Sahibkarlıq

Xəzər Avropa İnteqrasiya İşgüzar Klubunda Həştərxan vilayətinin vitse-qubernatoru ilə görüş keçirilib

18 dekabr 2009 10:46 (UTC +04:00)

Bakı. Aynur Vəliyeva - APA-Economics. Bu gün Bakıda Rusiyanın Həştərxan vilayətinin vitse-qubernatoru, Həştərxan hökumətinin başçısı Konstantin Markelovun Xəzər Avropa İnteqrasiya İşgüzar Klubunun (CEIBC) üzvləri ilə görüşü keçirilib.

“APA-Economics”in məlumatına görə, vitse-qubernator jurnalistlərə açıqlamasında Bakı limanı ilə Həştərxanın Olya limanı arasında bərə nəqliyyatı əlaqələrinin bərpa edilməsi ilə bağlı Xəzər Dəniz Gəmiçiliyində danışıqlar aparıldığını bildirib.

Bərə nəqliyyatının bərpası Bakı ilə Həştərxan arasında avtomobil və dəmiryol nəqliyyatında yaranan problemləri aradan qaldırmaq məqsədiğ ilə həyata keçirilir.

K.Markelovun sözlərinə görə, bununla bağlı tərəflər arasında 2010-cu ilin yazında müvafiq protokol və sazişin imzalanması gözlənilir və artıq yaxın aylarda bərə xəttinin bərpası nəzərdə tutulur.

Sazişin şərtlərinə əsasən, həmçinin Olya limanının inkişaf etdirilməsi planlaşdırılır. Bakı ilə Həştərxan arasında bərə nəqliyyatının bərpası layihəsinin həyata keçirilməsinə problem yaradan amillərdən biri logistik sxemin təşkil edilməsi ilə bağlıdır. Layihənin reallaşması üçün əlaqələndirmə mərkəzinin yaradılması tələb olunur. Bu mərkəz Rusiya və Azərbaycan tərəfindən yüklərin toplanması işlərini əlaqələndirməsi ilə məşğul olacaq.

“Maraqlı təkliflər var və yaxın bir neçə həftə ərzində Həştərxanda təşkilatı işlər aparılacaq. Bununla yanaşı, biz dəmiryolu bərəsi vasitəsilə bərə nəqliyyatının bərpası məsələsini müzakirə etmişik. Bu gün artıq Olya limanına dəmiryolu qolu çəkilib və müvafiq terminalın tikintisi tələb olunur. Bu layihənin həyata keçirilməsi istiqamətində işlərə 2010-cu ildə başlamağa hazırlaşırıq”, - deyə K.Markelov gələcək planları açıqlayıb.

K.Markelovun verdiyi məlumata görə, Olya limanının yük emalı gücü hazırda 4 mln. ton təşkil edir, yaxın zamanda isə bunun 8 mln. tonadək artırılması nəzərdə tutulur. Limanın yük emalı potensialı isə 30 mln. tona bərabərdir.

Tədbir çərçivəsində K.Markelova CEIBC-nin fəxri üzvü sertifikatı təqdim edilib. Sertifikatlar eyni zamanda görüşdə iştirak edən Rusiyanın Azərbaycandakı səfiri Vladimir Doroxinə, Azərbaycan-Rusiya Ticarət Palatasının rəhbəri Yuri Şedrinə, «VTB Azerbaijan” bankının nümayəndəsinə və digər iş adamlarına da verilib.