Sahibkarlıq

Ana səhifə

Sahibkarlıq

Həştərxan hökumətinin başçısı Bakıya səfərinin nəticələrinə dair mətbuat konfransı keçirib

18 dekabr 2009 14:46 (UTC +04:00)

Bakı. Laçın Sultanova - APA. Həştərxan vilayətinin vitse-qubernatoru, Həştərxan hökumətinin başçısı Konstantin Markelov Bakıya səfərinin nəticələrinə dair mətbuat konfransı keçirib.

APA-nın məlumatına görə, K.Markelov bildirib ki, 25 nəfərdən ibarət nümayəndə heyətinə vilayət hökumətinin və biznes dairələrinin təmsilçiləri daxil olub: “Səfərin məqsədi gələn ilin aprelində bitəcək əməkdaşlıq haqqında sazişini yeniləməkdir. Bunun üçün işçi qrup yaradılacaq, yazda yeni saziş imzalanacaq”.

Müxtəlif nazirlik və idarələrdə çox məhsuldar görüşlər keçirdiklərini bildirən vitse-qubernator deyib ki, nəqliyyat sahəsində əməkdaşlığı genişləndirmək, aviaxətlərin Bakı ilə Olya limanları arasında bərə reyslərinin sayını, yükdaşımaları artırmaq qərara alınıb: “Həştərxanın dəmir yol nəqliyyatı təmiri üzrə müəssisələri Azərbaycan Dövlət Dəmir Yoluna məxsus vaqon və avadanlıqların təmirində iştirak edəcək, gələn il 30 teplovoz Həştərxanda təmir olunacaq, Azərbaycan ərazisində dəmir yolu nəqliyyatı üçün detallar hazırlayan sex yaradılacaq”.

Səfər zamanı Xəzərdə əməkdaşlıq imkanları da müzakirə olunub. K.Markelovun dediyinə görə, bura karbohidrogen yataqlarının birgə işlənməsi, bioresursların qorunması, nərəkimilərin ovlanmasına məhdudiyyət qoyulması və s. daxildir.

Həştərxanda Nərimanov rayonu olduğunu xatırladan vitse-qubernator bildirib ki, gələn il Nəriman Nərimanovun anadan olmasının 140 illiyi ilə bağlı birgə tədbirlər planı hazırlanacaq: “Azərbaycanla Həştərxan vilayəti arasında təhsil, səhiyyə və mədəniyyət sahəsində əməkdaşlığın genişləndirilməsi məsələləri üzrə də bir sıra razılıqlar əldə olunub”.