Sahibkarlıq

Sahibkarlıq

Azərbaycanın uzaq xarici ölkələrlə ticarət dövriyyəsində müsbət saldo 5 dəfə, MDB ölkələri ilə mənfi saldo 3% azalıb

21 dekabr 2009 12:55 (UTC +04:00)

Bakı. Rəşad Süleymanov – APA-Economics. Cari ilin yanvar-noyabr aylarında Azərbaycanın uzaq xarici ölkələrlə ticarət dövriyyəsində 7 897 448,7 min ABŞ dolları dəyərində müsbət saldo, MDB ölkələri ilə ticarət dövriyyəsində isə 180 576,1 min dollar dəyərində mənfi saldo yaranıb. Bu barədə «APA-Economics»ə Dövlət Gömrük Komitəsindən məlumat verilib.

Uzaq xarici ölkələrlə ticarət dövriyyəsində müsbət saldo 5,2 dəfə, MDB ölkələri ilə mənfi saldo 3,4% azalıb.

Hesabat dövründə uzaq xarici ölkələrə 11 652 733,4 min dollar (azalma 3,9 dəfə), MDB ölkələrinə isə 1 512 814,4 min dollar (azalma 0,8%) dəyərində mal ixrac edilib. Müvafiq olaraq uzaq xarici ölkələrdən 3 755 284,8 min dollar (azalma 15,7%), MDB-dən 1 693 390,6 min dollar (azalma 26,9%) dəyərində mal idxal olunub.

Yanvar-noyabr aylarında Azərbaycanın uzaq xaricə və MDB ölkələrinə ixracatında əsas yeri mineral yanacaq, neft və neft məhsulları, bitiumlu minerallar təşkil edib. Hesabat dövründə uzaq xarici ölkələrdən Azərbaycana əsasən avadanlıqlar və mexaniki qurğular, elektrik maşınları, onların hissələri, MDB ölkələrindən isə dənli bitkilər, elektrik maşınları və avadanlıqları, onların hissələri, quru nəqliyyatı vasitələri və s. idxal olunub.

Qeyd edək ki, hesabat dövründə xarici ticarətlə 8 753 hüquqi və fiziki şəxs məşğul olub. İxrac əməliyyatlarında dövlət sektorunun payı 93,50%, özəl sektorun payı 5,4%, fiziki şəxslərin payı isə 1,07% olub. İdxalda isə bu göstərici müvafiq olaraq 32,63%, 62,51% və 4,86% təşkil edib.