Sahibkarlıq

Ana səhifə

Sahibkarlıq

Bu il Azərbaycanda saxlama müddəti ötmüş və mənşəyi məlum olmayan 132,2 ton ərzaq məhsulları satışdan çıxarılaraq məhv edilib

22 dekabr 2009 12:17 (UTC +04:00)

Bakı. Nicat Mustafayev – APA-Economics. Bu il Azərbaycan İqtisadi İnkişaf Nazirliyi yanında İstehlak Bazarına Nəzarət üzrə Dövlət Xidməti tərəfindən keçirilən monitorinqlər zamanı ümumi çəkisi 132,2 ton olan saxlama müddəti ötmüş və mənşəyi məlum olmayan ərzaq məhsulları aşkar olunub və satışdan çıxarılaraq məhv edilib.

Nazirlikdən «APA-Economics»ə verilən məlumata görə, yararsız malların 7,7 tonunu ət və ət məhsulları, 15,4 tonunu süd və süd məhsulları, 27 tonunu mineral sular və sərinləşdirici içkilər, 17,6 tonunu şəkər və qənnadı məhsulları təşkil edib.

Dövlət Xidməti tərəfindən bu müddətdə həmçinin 6 ton yağ, 2,3 ton konservləşdirilmiş məhsullar, 2,4 ton quru meyvə, 5,4 ton tamlı məhsullar (tomat pastası, ketçup və s.), 35,9 ton alkoqollu içkilər, 0,3 ton balıq və digər dəniz məhsulları, 1,1 ton yarımfabrikatlar və digər saxlama müddəti ötmüş və mənşəyi məlum olmayan ərzaq məhsulları satışdan çıxarılaraq məhv edilib. Satışdan çıxarılaraq məhv edilmiş malların 1,7 tonu uşaq yeməkləridir.

Qanun pozuntusuna yol vermiş şəxslər barəsində Azərbaycan Respublikasının İnzibati Xətalar Məcəlləsinə uyğun olaraq, protokol tərtib edilmiş 59 hüquqi şəxsə 223,2 min manat, 694 fiziki şəxsə isə 1 037,8 min manat inzibatı cərimə tətbiq olunub.