Sahibkarlıq

Ana səhifə

Sahibkarlıq

Ötən il Azərbaycanda vergi cinayətlərinə görə 228 cinayət işi açılıb

14 yanvar 2010 08:06 (UTC +04:00)

Bakı. Rəşad Süleymanov - APA-Economics. Azərbaycan Vergilər Nazirliyi tərəfindən 2009-cu ildə vergidən yayınma, qanunsuz sahibkarlıq və başqa faktlarla bağlı materiallar üzrə 228 cinayət işi başlanılıb. Bu barədə «APA-Economics»ə Vergilər Nazirliyindən məlumat verilib.

Başlanmış cinayət işlərinin sayı 2008-ci ilin göstəricisindən 19,4% çox olub. Hesabat dövründə ibtidai istintaqı tamamlanmış 180 cinayət işindən vergiləri ödəməkdən yayınmaya görə 49 iş, qanunsuz sahibkarlığa görə 17 iş, aksiz markası ilə markalanmalı olan məhsulların belə marka olmadan satış məqsədilə əldə edilməsinə görə 1 iş, dələduzluq yolu ilə özgə əmlakını ələ keçirməyə görə 1 iş (cəmi 102 nəfər barəsində 76 iş) baxılması üçün məhkəmələrə göndərilib.

Bir sıra müəssisələrin rəhbərləri və fiziki şəxslər yayındırdıqları vergiləri ibtidai istintaq zamanı tamamilə ödədiklərinə görə barələrində olan 64 cinayət işinə xitam verilib. İstintaqı tamamlanmış cinayət işləri üzrə vurulmuş ziyandan 9 mln. 168 min manat və cinayət işi başlanılması rədd edilmiş materiallar üzrə 2 mln. 638 min manat məbləğində vəsaitin dövlət büdcəsinə ödənilməsi təmin olunub.

Hesabat ilində vergi ödəməkdən yayınan və qanunla istintaqı vergi orqanlarının səlahiyyətinə aid olan digər cinayətlər törətmiş 45 nəfər təqsirləndirilən şəxs barəsində məhkəmələr tərəfindən həbs-qətimkan tədbiri seçilib. Vergi cinayətləri törətdiklərinə görə barələrində axtarış elan edilmiş 36 şəxs tutularaq Vergi Cinayətlərinin Araşdırılması Departamentinin istintaq şöbəsinə təhvil verilib, ibtidai istintaqdan yayınan 164 şəxsin məcburi qaydada gətirilməsi təmin olunub.

Daxil olmuş əməliyyat məlumatları və müraciətlərin araşdırılması nəticəsində 104 şəxs haqqında toplanmış materiallar aidiyyəti vergi orqanlarına göndərilib, vergi orqanlarının müraciətinə əsasən yoxlamalardan yayınan 114 nəfər vergi ödəyicisi isə tapılıb vergi idarələrinə təqdim olunub.