Sahibkarlıq

Sahibkarlıq

Azpromo-nun Gürcüstan nümayəndəliyinin rəhbəri ilə Borçalının iş adamları ilə görüşüb

14 yanvar 2010 14:01 (UTC +04:00)

Marneuli. Nizami Məmmədzadə - APA. Bu gün Marneulidə Azərbaycanlıların Mədəniyyət Mərkəzində Azərbaycanda İxracın və İnvestisiyaların Təşviqi Fondunun (Azpromo) Gürcüstan nümayəndəliyinin rəhbəri İlqar Vəliyevlə Borçalıda fəaliyyət göstərən 30-dan artıq iş adamının və QHT nümayəndələrinin görüşü keçirilib.

APA-nın Gürcüstan bürosunun məlumatına görə, görüşü Mədəniyyət Mərkəzinin rəhbəri Fazil Həsənov açaraq, İ.Vəliyevi görüş iştirakçılarına təqdim edib və Azpromo-nun Gürcüstan nümayəndəliyi barədə qısa məlumat verib.

Görüşdə çıxış edən İ.Vəliyev Azpromo-nun Gürcüstan nümayəndəliyinin fəaliyyəti haqqında danışıb, daha sonra isə iş adamları ilə fikir mübadiləsi aparıb. Çıxış edən iş adamları qeyd ediblər ki, iqlim şəraiti və relyefinə görə Borçalı bölgəsində kənd təsərrüfatını və sənayeni inkişaf etdirmək üçün istənilən şərait var. Burada fəaliyyət göstərən hər bir iş adamı və yaxud QHT nümayəndəsi müxtəlif məqsədyönlü layihələrin həyata keçirilməsi üçün maddi dəstəyin olmadığını vurğulayıb. Görüşdə qeyd olunub ki, Borçalıda az da olsa, QHT sektoru inkişaf edir. Lakin bölgədə emal müəssisələrin və iş yerlərinin olmaması və yaxud Gürcüstanda fəaliyyət göstərən şirkətlərə azərbaycanlıların yalnız fəhlə kimi cəlb olunması bildirilib.

Görüşdə həmçinin, işsizlik ucbatından gənclərin Azərbaycana və digər xarici ölkələrə miqrasiyasının çoxalması qeyd olunub. Tədbirdə Borçalıda, xüsusən sərhədyanı kəndlərdə olan sənaye potensiyalından və işləməyən zavodların bərpası sayəsində yeni iş yerlərinin açılacağı, burada olan torpaqlardan azərbaycanlıların istifadə edə bilməməsi, Rusiyaya çıxış yolu bağlandıqdan sonra Borçalıda yetişdirilən kənd təsərrüfatı və ərzaq, ət məhsullarının Azərbaycana satışı üçün icazə məsələsi barədə də fikir mübadiləsi aparılıb. İş adamları onların layihələrinə investisiya qoyulmaması, Gürcüstan banklarının yüksək faizlə kredit verməsi və texnika almaq üçün kreditlərin alınmasına əngəl törədildiyini müzakirə ediblər.

Azpromo-nun nümayəndəsi görüş iştirakçılarına gələcəkdə Marneulidə «Mikro kredit» qrumu və «Aqrolizinq» şirkətinin yaradılması, Borçalı iş adamlarının Gəncədə istehsal olunan «Belarus» markalı traktorlarla təmin edilməsi məsələsi barədə razılaşma aparıldığını bildirib.

Jurnalistlərə açıqlamasında isə İ.Vəliyev bildirib ki, Borçalıda fəaliyyət göstərən sahibkarların əsas problemi onların layihələrinə investisiya qoyulmamasıdır: «Düşünürəm ki, bu problemi həll edəcəyik. Bu gün Azərbaycan dövləti Gürcüstana böyük investisiyalar qoyur. Azərbaycan Dövlət Neft Şirkətinin bu ölkədəki fəaliyyəti və iş təcrübəsi göz qabağındadır. Gələcəkdə Azərbaycan bankları tərəfindən Borçalıya da investisiya qoyulması nəzərdə tutulub».