Sahibkarlıq

Sahibkarlıq

Bakı mağazalarında keyfiyyətsiz yağ aşkar edilib

16 yanvar 2010 10:53 (UTC +04:00)

Bakı. Nicat Mustafayev - APA-Economics. Azərbaycan İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti istehlakçıların hüquqlarının müdafiəsini təmin etmək məqsədilə ticarət dövriyyəsində olan yeyinti məhsullarının keyfiyyəti və təhlükəsizliyi ilə bağlı apardığı nəzarət tədbirləri zamanı keyfiyyətsiz yağ aşkar olunub.

Nazirlikdən «APA-Economics»ə verilən məlumata görə, tədbirlər çərçivəsində Dövlət Xidməti tərəfindən şəhərin bir sıra mağazalarında satışda olan yağlardan nümunələr götürülərək laborator müayinə olunub.

Laborator müayinələr nəticəsində hüquqi ünvanı Bakı şəhəri, Nizami rayonu, Rüstəmov küçəsi 20, ev 1 olan və N.Nərimanov rayonu, Ə.Qayıbov küçəsi, 10 ünvanında süd və süd məhsullarının istehsalı ilə məşgul olan «Fazil» firması tərəfindən istehsal olunmuş 10 kiloqramlıq qutularda qablaşdırılmış «Xüsusi yağ» əmtəə nişanlı kombinə edilmiş yağın fiziki-kimyəvi göstəricilərinin məhsulun etiketindəki göstəricilərə və normalara uyğun olmadığı müəyyən edilib.

Bununla əlaqədar Antiinhisar Siyasəti və İstehlakçıların Hüquqlarının Müdafiəsi Dövlət Xidməti bu məhsulların istehsal edildiyi «Fazil» firmasında yoxlamaya başlayıb, müəssisənin anbarında olan 10 və 20 kiloqramlıq qutularda qablaşdırılmış hazır məhsuldan nümunələr götürülərək müayinəyə göndərilib.

Bu nümunələrin laborator müayinəsi də əvvəlki nəticələri təsdiq edib və məhsulun ümumi yağlılığının etiketindəki göstəricidən 4,1% az, nəmliyin kütlə payının isə normadan 5,9% çox olduğu müəyyən edilib. Eyni zamanda bu yağda süd məhsullarına xas olmayan dad aşkar olunub.

Bununla əlaqədar olaraq «Fazil» firmasının anbarında olan 24,9 ton hazır məhsulun satışı Dövlət Xidməti tərəfindən dayandırılıb.

Hazırda bu məhsulun tərkibinin təsdiq edilmiş resepturaya və mikrobioloji göstəricilərinin normativ sənədlərin tələblərinə uyğunluğunun müəyyən edilməsi ilə bağlı araşdırmalar davam edir.