Sahibkarlıq

Sahibkarlıq

Azərbaycanda ötən il 93 müəssisə məhsul istehsalını dayandırıb

18 yanvar 2010 15:15 (UTC +04:00)

Bakı. Rəşad Süleymanov – APA-Economics. Azərbaycan Standartlaşdırma, Metrologiya və Patent üzrə Dövlət Komitəsi (SMPDK) tərəfindən 2009-cu ildə hüquqi və fiziki şəxs statusu ilə fəaliyyət göstərən 93 müəssisədə məhsul istehsalı dayandırılıb. Bu barədə «APA-Economics»ə SMPDK-in mətbuat xidmətindən məlumat verilib.

Komitə tərəfindən ötən il 1 113 təsərrüfat subyektində məhsulun keyfiyyətinə, standartlara, metroloji norma və qaydalara əməl olunmasına dövlət nəzarəti həyata keçirilib. Araşdırmalar nəticəsində aşkar olunmuş ciddi nöqsanlara, o cümlədən istehsal olunan məhsulların insan həyatı və sağlamlığına təhlükə yaratdığına, normativ sənədlərin tələblərinə cavab vermədiyinə görə həmin müəssisələrdən 93-də məhsul istehsalı dayandırılıb. Ümumi dəyəri 381 975 min manat olan 340 məhsul partiyasının satışı qadağan olunub, həmin təsərrüfat subyektlərinə 277 iradnamə və 433 tələbnamə verilib. Ciddi nöqsanlara yol vermiş müəssisələr üzrə qanunvericiliklə nəzərdə tutulmuş qaydada 118 protokol tərtib edilib və 76 475 manat məbləğində cərimə sanksiyaları tətbiq olunub.

Ötən il həmçinin, məhsul istehsalı və idxalı ilə məşğul olan 2 066 hüquqi və fiziki şəxslərin sifarişləri əsasında 3 541 adda məhsula AZS Milli Sertifikatlaşdırma Sisteminin tələblərinə müvafiq olaraq uyğunluq və tanınma sertifikatları verilib. Yeyinti məhsullarının keyfiyyətinə nəzarət məqsədi ilə aparılmış yoxlamalar nəticəsində fiziki-kimyəvi və mikrobioloji göstəriciləri insan sağlamlığı üçün təhlükə yaradan, ölkədə istehsal olunan və idxal yolu ilə gətirilən 39,7 ton qənnadı məmulatları, 888,4 ton düyü, 9,8 ton balıq konservləri, 56,3 min litr alkoqolsuz içkilər və meyvə şirələri, 7,3 ton un, 10,1 ton süd məhsulları, 8,5 ton tərəvəz məhsulları və bir sıra digər ərzaq məhsulları dövriyyədən çıxarılaraq məhv edilib.

Ötən il həmçinin Çində istehsal olunan 10 adda uşaq oyuncaqları toksiki elementlərin miqdarına görə normativ sənədlərin tələblərinə cavab vermədiyi üçün satışdan çıxarılaraq məhv edilib.

Qış mövsümü ilə əlaqədar 156 ədəd texniki təhlükəsizlik qaydalarına uyğun olmayan, müvafiq qaydada sertifikatlaşdırılmamış, kustar üsulla hazırlanmış və primitiv qızdırıcılar, sobalar və digər məişət cihazları ticarət şəbəkəsində satışdan çıxarılıb. Texniki təhlükəsizlik qaydalarına uyğun olmayan cihazlara uyğunluq sertifikatı verilməsi barədə 3 təsərrüfat subyektinin müraciəti isə rədd edilib.