Sahibkarlıq

Ana səhifə

Sahibkarlıq

ADA Şirkətlər Qrupu: Azərbaycanda biznes üçün yaradılmış şəraitdən faydalanaraq fəaliyyətimizi daha da genişləndirmək əzmindəyik

22 yanvar 2010 15:37 (UTC +04:00)

Bakı – APA-Economics. ADA Şirkətlər Qrupu son günlər bəzi mətbuat orqanlarında şirkətin fəaliyyəti barədə dərc olunan yazılarla bağlı KİV üçün açıqlama yayıb.

ADA-nın PR şöbəsindən “APA-Economics”ə göndərilən açıqlamada bir sıra mətbu orqanlarda Şirkətlər Qrupu haqqında dərc olunan yazıların həqiqətdən çox uzaq və dedi-qodu xarakterli yazılar olduğu bildirilir: “Bu yazılar nəinki səsləndirilən fikirlər, hətta mətn baxımından belə eynidir. Bu da onu göstərir ki, bu tip yazılar sifarişlidir və ancaq bir məqsədə - ADA Şirkətlər Qrupunun imicinə zərbə vurmağa xidmət edir”.

Açıqlamada bir neçə mağazanın bağlanması əsas tutularaq bunun böyük bir şirkətin iflası kimi təqdim olunması cəhdləri də pislənilir: “Azad bazar iqtisadiyyatı şəraitində zəif olan sahəni ləğv etmək (bu halda mağazanı bağlamaq), işçi vahidlərinin ixtisarı və s. gələcəkdə yarana biləcək daha böyük maliyyə itkisinin qarşısını alır. Elə şirkətin biznes planında da rentabelliyi aşağı olan mağazaların bağlanması və ya köçürülməsi əvvəlcədən nəzərdə tutulub”.

Sonda şirkətin holdinqlərə borcunun yaranması məsələsinə də aydınlıq gətirilir: “Heç kimə sirr deyil ki, 2008-ci ilin sonlarından etibarən dünyada baş vermiş maliyyə böhranı bir çox strukturları, o cümlədən maliyyə institutlarının müəyyən çətinliklərlə üzləşməsinə səbəb olub. Bu səbəbdən qısa müddətdə yeni kreditlərin cəlb olunmasında müəyyən problemlər yaranıb. Aydın məsələdir ki, hələ dirçəliş mərhələsində olan, genişlənməkdə olan bir şəbəkənin bu tip problemlə üzləşməsi də təbiidir. Lakin bütün bunlara baxmayaraq, ADA Şirkətlər Qrupunun menecerləri əlavə vəsaitlərin cəlbi üçün uğurla nəticələnmiş addımlar atıblar. ADA Şirkətlər Qrupu öz partnyorlarını və “Almalı-market”lərin alıcılarını bu tip yazılardan narahatlıq keçirməməyə çağırır. ADA Şirkətlər Qrupu ölkənin ərzaq sektorunda monopolist olmaq iddiasında olan, qeyri-şəffaf təşkilati, hüquqi və maliyyə strukturlarına malik şirkətlərdən fərqli olaraq, öz fəaliyyətini Azərbaycanda biznes mühiti üçün yaradılmış əlverişli şəraitdən faydalanmaqla daha da genişləndirmək əzmindədir”.

Qeyd edək ki, «Almalı» mağazalar şəbəkəsinin operatoru olan «ADA» Şirkətlər Qrupu 2005-ci ildə yaradılıb. Qrupun əsas səhmdarlarından biri Beynəlxalq Maliyyə Korporasiyasıdır (BMK). Layihə ölkənin qeyri-neft sektorunda BMK-nın ən böyük maliyyə layihəsidir. Layihənin məqsədi “Regionların sosial-iqtisadi inkişafı Dövlət Proqramı”na dəstək olmaq, yerli fermerlər üçün böyük həcmli alıcı təbəqəsi formalaşdıraraq onlara stimul vermək, beləliklə, aqrar sənayenin inkişafına nail olmaqdır.