Sahibkarlıq

Ana səhifə

Sahibkarlıq

Azərbaycanda bir neçə məhsulun istehsalına qadağa qoyulub

26 yanvar 2010 09:00 (UTC +04:00)

Bakı. Nicat Mustafayev – APA-Economics. Azərbaycan Standartlaşdırma, Metrologiya və Patent üzrə Dövlət Komitəsi (SMPDK) bir neçə adda məhsul istehsalını dayandırıb.

Komitədən «APA-Economics»ə verilən məlumta görə, SMPDK-nın 1 saylı Ərazi Dövlət Nəzarəti İdarəsinin əməkdaşları keyfiyyətə dövlət nəzarəti tədbirləri nəticəsində bir sıra qanun pozuntusu faktı aşkarlayıb. Keçirilən nəzarət tədbirləri zamanı müəyyən olunub ki, «Marko» MMC idxal etdiyi «Zlato» günəbaxan yağı, «Avedov» günəbaxan yağı, «Osoboya Krakovskaya» kolbasası (yarım hisə verilmiş), «Braunveqskaya Osobaya» kolbasası (çiy hisə verilmiş), «Moskovskiy Servelat» kolbasası (bişmiş hisə verilmiş), «Lyubitelskaya» kolbasası (bişmiş), «Doktorskaya» kolbasası (bişmiş) məhsullarında AZS Milli Sertifikatlaşdırma Sisteminin tələblərini tətbiq etməyib, müəssisə sertifikatlaşdırmadan yayınıb və məhsulların markalanması qanunvericiliyə uyğun aparılmayıb. Aşkar olunmuş qanun pozuntuları ilə bağlı müəssisə rəhbərliyinə iradnamə, partiya satışının qadağan edilməsi barədə tələbnamələr verilib və inzibati protokol tərtib olunaraq 4 min manat cərimə tətbiq edilib.

Anoloji problem fiziki şəxs E.Vəliyevin rəhbərlik etdiyi təsərrüfat subyektində də qeydə alınıb. Müəssisə tərəfindən idxal olunan «Lıtkarinskiy Kombinat (Rusiya)» markalı ketçup və xardalın, süfrə suyunun, «Beslen» makaronlarının və «Soliti» duzlarının partiya satışı qadağan edilib, təsərrüfat subyektinə iradnamə və tələbnamələr təqdim edilib.

Bundan abşqa, «ADA Ticarət» QSC-də biskvitli kremli tort, şərq şirniyyatı və xingal sertifikatlaşdırılmadan satışa çıxarıldığına görə həmin məhsulların istehsalı qadağan edilib. Müəssisəyə İnzibati Xətalar Məcəlləsinə uyğun olaraq 4 min manat cərimə kəsilib.

Bununla yanaşı, fiziki şəxs B.Şahverdiyevə məxsus müəssisədə «Səma» nişanlı alkoqolsuz içkilər və qazlı suyun istehsalında nöqsanlar müəyyən olunub. Müəssisədə istehsal qadağan edilib, məhsulların məhv edilməsi barədə akt hazırlanıb.