Sahibkarlıq

Ana səhifə

Sahibkarlıq

Azərbaycanda yeni investisiya layihələrinin təqdimatı keçirilib

02 fevral 2010 10:39 (UTC +04:00)

Bakı. Vahab Rzayev – APA-Economics. Bu gün Bakıda Azərbaycan İqtisadi İnkişaf Nazirliyinin Sahibkarlığa Kömək Milli Fondu (SKMF) tərəfindən yeni investisiya layihələrinin təqdimatı keçirilib. «APA-Economics» xəbər verdiyi kimi, layihələr üç sahəni əhatə edir ki, bunlar uşaq qidası istehsalının təşkili, südlük cins iribuynuzlu heyvandarlıq komplekslərinin (ailə fermer təsərrüfatları) və üzüm emalı müəssisələrinin yaradılması üzrə investisiya layihələrinin güzəştli şərtlərlə maliyyələşdirilməsini nəzərdə tutur.

Təqdimatı keçirən SKMF-in icraçı direktoru Şirzad Abdullayev qeyd edib ki, layihələr üzrə təkliflər sahibkarlar tərəfindən 2010-cu ilin aprelin 1-dək müvəkkil kredit təşkilatlara təqdim edilməlidir. Təkliflər daha sonra Fonda təqdim ediləcək, aprelin 2-də təklif zərfləri açılacaq və layihələr üzrə qəbul edilən qərarlar aprelin 15-də elan olunacaq.

Layihələrə gəldikdə, Fond tərəfindən bir sıra tələb irəli sürülüb ki, onların arasında uşaq qidası istehsalında müasir texnoloqiyaların tətbiqi, sanitar-texniki, ekoloji göstəricilərin təmin edilməsi, südlük sahəsində təqdim edilən layihədə ən azı 100 başlıq kompleksin yaradılması, yem tələbatının ödənilməsi üçün müvafiq əkin sahələrə malik olması və ya sahibkarın yem istehsalçıları ilə sövdələşmələrinin olması, üzüm sahəsində də xammal tələbatının ödənilməsi və s. kimi tələblər mövcuddur.

Ş.Abdullayevin sözlərinə görə, layihələrin maliyyəşdirilməsində Azərbaycan İnvestisiya Şirkəti və onun törəmə şirkətləri tərəflərin razılığı əsasında payçı qismində iştirak edə bilər. Bundan əlavə, məsələn uşaq qidası məhsullarının Azərbaycanda fəaliyyət göstərən distribütor şirkətlərinə də layihələrdə birgə müəssisələrin yaradılması şəklində iştirak etməsi təklif edilir.

Fondun 2009-cu ilin yekunları barədə danışan Ş.Abdullayev qeyd edib ki, ötən il SKMF tərəfindən müvəkkil kredit təşkilatları vasitəsi ilə ölkənin 55 şəhər və rayonu üzrə 2 101 sahibkarlıq subyektinin investisiya layihəsinin maliyyəşdirilməsinə 130 mln. manat məbləğində güzəştli kreditlər verilib. Bu vəsaitin 74 mln. manatını büdcə vəsaiti, 56 mln. manatını isə Fondun xəzinə hesabına qaytarılmış kredit məbləğləri və kredit faizləri təşkil edib. Qeyd edək ki, maliyyələşdirilmiş layihələrin 99,2%-i regionların payına düşür.

Ötən il Fond tərəfindən həmçinin iri infrastruktur layihələrinin maliyyələşməsi həyata keçirilib. Belə ki, həmin layihələrə 47,8 mln. manat miqdarında kreditlər ayrılıb ki, bunun 31,9 mln. manatı ümumi tutumu 48 min ton olan müasir soyuducu anbar komplekslərinin yaradılması, 15,9 mln. manatı isə ümumi tutumu 199 min ton olan taxıl anbar komplekslərinin yaradılmasına sərf edilib.

Qeyd edək ki, əvvəlki kreditlər üzrə qaytarılan məbləğlər (71 mln. manat) və dövlət büdcəsindən ayrılan vəsait (44 mln. manat) nəzərə alınmaqla, Fondun 2010-cu üçün nəzərdə tutulmuş vəsaitlərinin həcmi 115 mln. manat təşkil edəcək.