Sahibkarlıq

Ana səhifə

Sahibkarlıq

Bakıda Azərbaycanda biznes qeydiyyatı hesabatının təqdimatı keçirilib

05 fevral 2010 09:39 (UTC +04:00)

Bakı. Nicat Mustafayev – APA-Economics. Bu gün Bakıda Dünya Bankının İnvestisiya Mühitinin Təkmilləşdirilməsi üzrə Məsləhət Xidmətləri Layihəsinin hazırladığı Azərbaycanda biznes qeydiyyatı hesabatının təqdimatı keçirilib.

«APA-Economics»in məlumatına görə, Dünya Bankı Qrupunun üzvü olan Beynəlxalq Maliyyə Korporasiyası (IFC) və Azərbaycanın müxtəlif orqanlarının nümayəndələrindən təşkil olunmuş işçi qrupu tərəfindən keçirilən araşdırma zamanı Azərbacyanda «bir pəncərə» sisteminin tətbiqindən sonra yeni sistemin daha effektiv olması səbəbindən il ərzində yeni bizneslərin qeydiyyatınının 30% artmısı müşahidə olunub.

Tədbirdə çıxış edən layihə rəhbəri Boris Devyak qeyd edib ki, araşdırmanın əsas məqsədi yeni prosedurların tətbiqi ilə bağlı hər hansı regionla fərqləri və Azərbaycanda şirkəti qeydiyyatdan keçirmək üçün mövcud olan digər maneələri aşkarlayaraq, yeni sistemin effektini, o cümlədən yeni şirkətlərin qeydiyyata sərf etdikləri vaxtın və xərclərin azaldılmasına təsirini qiymətləndirmək və ölçməkdir: «Ötən ilin avqust-oktyabr aylarında aparılmış araşdırmada 2008-ci ilin yanvar ayından etibarən qeydiyyatdan keçmiş kiçik və orta müəssisələrdən nümunə kimi istifadə edilib».

Tədbirdə həmçinin qeyd olunub ki, araşdırma islahatlar nəticəsində hüquqi şəxslərin şirkəti qeydiyyatdan keçirmək üçün iki dəfə az xərc çəkdiklərini və bunun üçün tələb olunan vaxtın 4 günədək azaldıldığını göstərib. Fərdi şəxslərin qeydiyyatla bağlı xərcləri orta hesabla 270 manatdan 20 manata düşüb və qeydiyyata tələb olunan günlərin sayı 3 dəfə azalıb. Yeni sistem güvvəyə mindiyi gündən 2009-cu ilin iyul ayınadək bütün sahibkarlar üzrə qənaət orta hesabla 19 mln. manat təşkil edib.

Tədbirdə çıxış edən Azərbaycan Vergilər Nazirliyi Xüsusi rejimli vergilər xidməti Departamentinin müdiri Zaur Fətizadə qeyd edib ki, Azərbaycanda «bir pəncərə» sisteminin tətbiqinə başlanan gündən indiyədək bu işlərə 5 mln. manat investisiya yatarılıb və həmin vəsait yeni texnologiyaların tətbiqinə və bu kimi məsələlərin həllinə sərf olunub: «Ümumiyyətlə, yeni sistemin tətbiqinə başlandığı gündən indiyədək vergi ödəyicilərin sayı 89% artıb və qeydiyyatdan keçmiş sahibkarlıq subyektlərinin əksəriyyəti hazırda fəaliyyət göstərir».

Qeyd edək ki, araşdırmanın əsas məqsədi yeni «bir pəncərə» sisteminin təsirini ölçmək və yeni şirkətlərə qeydiyyatla bağlı vaxtın və xərclərin azaldılmasına köməyin, yeni sistemin tətbiqi ilə bağlı həll olunmamış məsələlərin, ölkə üzrə yeni prosedurların tətbiqində fərqlərin, Azərbaycanda şirkətin qeydiyyatı ilə bağlı hələ də mövcud olan maneələrin, qeydiyyat prosedurları ilə bağlı xərclərin və fərmanın iqtisadi təsirinin qiymətləndirilməsidir.